«Փորձ է արվում կոտրել դիմադրությունը, որ տեսեք՝ Ղազինյանին «բեսպրեդելով» ազատեցինք, ձե՞զ ինչ կանենք, ոնց կանենք»,- լրագրողների հետ զրույցում հայտարարեց ՀԷՑ իրացման տնօրեն Դավիթ Ղազինյանը։
Նա, դիմելով ՀԷՑ աշխատակիցներին, ասաց․ «Ես հիմա կոչ եմ անում մեր 6800 աշխատակցին, որոնցից հավատացած եղեք, մեծ մասին անձամբ եմ ճանաչում, կոչ եմ անում մնալ, աշխատել՝ մեր ձևով, ի բարօրություն մեր ժողովրդի։ Հիմա եկողները, որ ասում են՝ հանուն ՀՀ-ի, վերջին տարիներին տեսել ենք՝ հանուն ՀՀ-ի ինչ է նշանակում»։
Կարդացեք նաև
Անդրադառնալով ՀԷՑ-ի աշխատակազմի կողմից ենթադրական սաբոտաժի մասին հարցերին՝ Դավիթ Ղազինյանն ասաց․ «Ես ասել եմ՝ սաբոտաժ չկա։ Իրավապահ մարմիններն իրենցն են․ թող ապացուցեն։ Նման հայտարարություններ առանց հիմքի անելը, 6800 հոգու առանց ապացույցի մեղադրել սաբոտաժի մեջ, իմ կարծիքով՝ անբարոյականություն է»։
Լրագրողների դիտարկմանը՝ փաստացի 6800 անձ չգիտի՝ մնալո՞ւ են, թե՞ գնալու, Դավիթ Ղազինյանն այսպես արձագանքեց․ «Իրենց՝ այս ձևն արդեն անվստահություն է ենթադրում՝ իմ աշխատանքային փորձը չգնահատելով, գոնե չհետաքրքրվելով։ Չկա բան, որի համար փոշմանած լինեմ, կամ անօրինական գործարք։ Նրա հայտարարությունն արդեն ցույց է տալիս իրենց նպատակները»։
Տաթև ՀԱՐՈՒԹՅՈՒՆՅԱՆ
