Հուլիսի 21-ին «Ավե Յուս» փաստաբանական գրասենյակում կայացավ միջոցառում՝ նվիրված ակադեմիկոս Վլադիկ Ներսեսյանցի մահվան 20-րդ տարելիցին: Միջոցառման վայրի ընտրությունն ամենեւին էլ պատահական չէր: Գրասենյակը հանդիսացել է Ներսեսյանցի՝ ռուսերենից հայերեն թարգմանված «Իրավունքի փիլիսոփայություն» գրքի տպագրության գլխավոր հովանավորը:
Վլադիկ Ներսեսյանցը ծնվել է 1938 թ. հոկտեմբերի 2-ին, Ստեփանակերտում: Նա իրավունքի փիլիսոփայության, քաղաքական եւ իրավական ուսմունքների ոլորտների մեծագույն մասնագետ է, իրավաբանական գիտությունների դոկտոր, պրոֆեսոր, Ռուսաստանի գիտությունների ակադեմիայի ակադեմիկոս:
Նա հեղինակել է շուրջ 400 գիտական աշխատանք, մի շարք կոլեկտիվ աշխատանքների համահեղինակ եւ խմբագիր է:
Միջոցառմանը ներկա էին գիտակրթական ոլորտի ներկայացուցիչներ, ովքեր ծանոթ են Ներսեսյանցի գիտական ժառանգությանը եւ ուսումնասիրել են ռուսերենից հայերեն թարգմանված եւ վերջերս լույս տեսած «Իրավունքի փիլիսոփայություն» աշխատությունը:
Կարդացեք նաև
Գրասենյակի հիմնադիր, փաստաբան, ի.գ.թ., դոցենտ Ավետիք Հարությունյանը շնորհակալություն հայտնեց ներկաներին՝ հրավերն ընդունելու եւ ներկա գտնվելու համար, եւ նշեց, որ այսօրվա քննարկումն ականավոր գիտնականի հիշատակին նվիրված հարգանքի տուրքի մատուցում է, ով երկրային կյանքին հրաժեշտ է տվել վաղաժամ՝ 2005թ. հուլիսի 21-ին, նրա աճյունն ամփոփված է Մոսկվայում:
Այս տարի նախատեսվում է կազմակերպել եւս մեկ՝ մասշտաբային գիտական միջոցառում՝ նվիրված ակադեմիկոս Ներսեսյանցի գիտական ժառանգությանը, ինչի մասին ազդարարել էր դեռեւս այս տարվա մարտի 25-ին՝ գրքի շնորհանդեսի օրը:
Ա. Հարությունյանը ներկաներին նվիրեց «Արցախ» հրատարակչության կողմից տպագրված Ներսեսյանցի «Философская лирика» գիրքը, որում ամփոփված են հեղինակի փիլիսոփայական ստեղծագործությունները:
Ա. ՆԱՐԻՄԱՆՅԱՆ
«Առավոտ» օրաթերթ
24.07.2025
