ԿԳՄՍ նախարար Ժաննա Անդրեասյանը օրերս ֆեյսբուքի իր էջում գրել էր,որ սեպտեմբերի 1-ից դպրոց է մտնելու «Հայաստանի պատմություն» առարկայի 9-րդ դասարանի դասագիրքը: Նա նաեւ լուսանկարներ էր հրապարակել դասագրքից, որը ստեղծել են Վահրամ Սողոմոնյանի Մասնակցային դպրոցի մասնագետները:
Aravot.am-ը կապվեց Վահրամ Սողոմոնյանի հետ, հետաքրքրվեցինք՝ ինչու դասագրքի առցանց տարբերակը զետեղված չէ էլեկտրոնային պաշարների շտեմարանում կամ որեւէ այլ առցանց հարթակում, ինչպես արվում է սովորաբար:
Նա ասաց, որ օգոստոսին կտեղադրվի Պաշարների շտեմարանում եւ ԴՇՀ (դասագրքերի շրջանառու հիմնադրամի) կայքում: Նաեւ նշեց,որ տեղադրման ժամկետը ԿԳՄՍ նախարարությունից է կախված:
Հարցրինք՝ իսկ դասագրքի շապիկի նկարը 1988, թե 2018թ ցույցերից է: Վահրամ Սողոմոնյանը պատասխանեց՝ 1988:
Կարդացեք նաև
ԿԳՄՍ նախարարությունից էլ մեկնաբանություն խնդրեցինք,խոստացան ճշտելուց հետո պատասխանել:
9-րդ դասարանի «Հայաստանի պատմության» դասագրքի նախաբանում հեղինակները գրել են, որ այս անգամ «ճամփորդությունը» սկսվում է 19-րդ դարի վերջերից եւ ավարտվում 21-րդ դարի սկզբին՝ գրեթե մեր օրերում: Հեղինակները գրել են, որ կան որոշակի վիճելի փաստեր եւ նույն պատմական իրադարձությունը կարող է տարբեր լույսի ներքո ներկայացվել՝ կախված նրանից, թե ով է պատմությունը պատմողը:
Հիշեցնենք, որ Մասնակցային դպրոցի կազմած պատմության մեկ այլ դասագիրք աղմուկ էր հանել, դասագրքի բովանդակության վերաբերյալ քննադատական կարծիքներ էին հնչել մասնագետների կողմից:
Գոհար ՀԱԿՈԲՅԱՆ
