ՀՀ կադաստրի կոմիտեի Շիրակի մարզային ստորաբաժանման արխիվի բաժնի պետ Ա.Ա-ից փորձել էին ազատվել նախ գլխավոր քարտուղարի նկատողությամբ, ապա կոմիտեի ղեկավարի հրամանով նրա լիազորությունները դադարեցնելով:
Վարչական դատարանի վճռով արխիվի պետը վերականգնվել էր իր աշխատանքում: Նա մոտ երեք տարի հայտնվել էր հարկադիր պարապուրդում: ՀՀ վարչական դատարանը մասնակի էր բավարարել Ա.Ա-ի (նրա խնդրանքով, կհրապարակենք միայն անուն-ազգանվան սկզբնատառերը-Ռ.Մ.) հայցապահանջը, վճարելու հարկադիր պարապուրդի ամբողջ ժամանակահատվածի համար միջին աշխատավարձի մնացած մասով հայցապահանջը մերժել էր: Կոմիտեն դիմել էր վերաքննիչ բողոքով վերաքննիչ վարչական դատարան, որը 2024թ. հուլիսի 11-ին մերժել էր բողոքը:
Կադաստրի կոմիտեն այս անգամ վճռաբեկ բողոք էր բերել:
ՀՀ վճռաբեկ դատարանն օրեր առաջ արձանագրել է, որ հարկադիր պարապուրդի ժամանակահատվածն ընդգրկում է այն ժամանակահատվածը, որի ընթացքում աշխատողը «ոչ իր մեղքով» մեկուսացվում է աշխատանքային հարաբերություններից: ՀՀ վճռաբեկ դատարանը մերժել է ՀՀ կադաստրի կոմիտեի բողոքը, իրավաչափ համարել թե վարչական, թե վերաքննիչ վարչական դատարանների որոշումները, հղում կատարել ՀՀ աշխատանքային օրենսգրքին (265 հոդվածի 1-ին մաս), փաստելով, որ հայցվորին հարկադիր պարապուրդի ողջ ժամանակահատվածի համար միջին աշխատավարձը ենթակա է ամբողջ ծավալով վճարման՝ «անկախ որեւէ գործատուի մոտ աշխատած լինելու հանգամանքից»:
Կարդացեք նաև
Ռուզան ՄԻՆԱՍՅԱՆ
«Առավոտ» օրաթերթ
29.07.2025
