Նիկոլ Փաշինեան արձակուրդի մեկնելէ առաջ աւետեց, որ 2021-ի ընտրարշաւի խոստումը` «Ապագայ կայ, կա՛յ ապագայ», արդէն իրականացած է:
Ո՛վ չ՛ընդունիր իրականացած այս ապագան, ո՛վ տակաւին կը խօսի իշխանութիւններու կողմէ մոռացութեան տրուած իրաւունքներու մասին, ո՛վ չ՛ընդունիր իշխանութիւններու վարած զիջողական քաղաքականութիւնը, ո՛վ վերջապէս կը պահանջէ իշխանութեան փոփոխութիւնը, ահաբեկիչ է, պետութիւնը կործանող է, «բռնի» իշխանափոխութեան ջատագով է:
Նիկոլ Փաշինեան կը յաւակնի հայ ժողովուրդի հաւաքական յիշողութեան ներարկել եւ ընդունելի դարձնել այնպիսի գաղափարներ, որոնք կը հակադրուին դարերու ընթացքին գոյացած, միս ու արիւն դարձած ըմբռնումներուն: Ասիկա նոր իսկական Հայաստանի, նոր ժողովուրդի, նոր եկեղեցւոյ, նոր պետականութեան շփոթուած «գաղափարաբանութիւնն» է, որ կը ջնջէ իրմէ առաջ եղած ամէն բան. պատմութիւն, հայրենիք, մշակոյթ ու ժողովրդագրութիւն:
Ազգային նոր գաղափարաբանութիւնը ժողովրդականացնելու համար, Փաշինեան ամոլը ստեղծեց «կրթուելը նորաձեւ է» շարժումը: Հաւաքներով, դասախօսութիւններով, զրոյցներով տիկին Աննան եւ անձամբ պարոն Փաշինեանը կը բացատրեն, որ սխալ ապրած ենք մինչեւ իրենց յայտնուիլը եւ թէ իրենք, եկեղեցւոյ աղանդաւորներու նմանողութեամբ, կը բացայայտեն Բանն Աստուծոյ եւ բանն ազգին ու հայրենիքին ճշմարտութիւնը, իրենց ճշմարտութիւնը:
ՏԻԳՐԱՆ ՃԻՆՊԱՇԵԱՆ
Հոդվածն ամբողջությամբ՝ «Ազդակ» օրաթերթում:
