«Իմ քայլը» հիմնադրամի «Պատերազմի մասնակիցների մասնագիտական ներուժի բացահայտման ծրագիր»-ը յուրահատուկ հնարավորություն է այն երիտասարդների համար, ովքեր անցել են 44-օրյա պատերազմի փորձությունը, բայց որոշել են շարունակել ապրել, արարել, ստեղծել իրենց, իրենց ընտանիքների և երկրի համար:
Ծրագիրն ունի մի քանի փուլ․ շահառուները նախ մասնակցում են մասնագիտական կողմնորոշման ճամբարին, որտեղ ստանում են անհատական խորհրդատվություն՝ իրենց նախասիրությունների, կարողությունների և տեղային հնարավորությունների համադրման հիման վրա։ Այս գործընթացի շնորհիվ յուրաքանչյուր մասնակից ի վերջո ընտրում է իր անհատական զարգացման ուղին։ Ոմանք որոշում են ստեղծել կամ ընդլայնել իրենց բիզնեսը, իսկ մյուսները՝ ընտրել հստակ մասնագիտություն, որը կուզենան սովորել և որով կկարողանան աշխատել։ Բիզնես գործունեությամբ զբաղվել ցանկացողների համար հիմնադրամը նախ կազմակերպում է բիզնես կառավարման և պլանավորման դասընթացներ, որի վերջում միայն մասնակիցները ներկայացնում են իրենց գործարար ծրագրերը հատուկ ձևավորված հանձնաժողովին և ստանում ֆինանսավորում: Իսկ նրանց համար, ովքեր ցանկանում են նոր մասնագիտություն ձեռք բերել, հիմնադրամը հոգում է վերապատրաստման դասընթացների ծախսերը:
2024-2025 թվականներին ծրագիրն իրականացվում էր ՀՀ երեք մարզերում` Արարատ, Կոտայք, Վայոց ձոր, և ներառում էր 83 շահառու, ում հետ ամիսներ շարունակ աշխատել են «Իմ քայլը» հիմնադրամի մարզային աշխատակիցները, ծրագրի ղեկավարը, բիզնես փորձագետներ, ոլորտային մասնագետներ և այլն: Այժմ` ծրագրի ավարտին, երբ նրանց ձեռքբերումները կամաց-կամաց տեսանելի են դառնում, կիսվում ենք մասնակիցների անցած ուղիով և հաջողություններով:
Ծրագրի այս փուլի շահառուներից է Վարդան Հակոբջանյանը, որը զբաղվում է ձիաբուծությամբ։ Նա առանձնահատուկ խնամքով ու սիրով է խնամում ձիերին, քանի որ դեռ մանկուց իր տարերքն են եղել: Հիմնադրամը ծրագրի շրջանակում Վարդանին տրամադրել է 6 ձի, որը հնարավորություն է տվել ընդլայնել ձիաբուծության բիզնեսը: Նրա խոսքերով ձիաբուծությունը օգնում է մասամբ հոգալ ընտանիքի ծախսերն ու նպաստել տնտեսապես կայունացմանը:
Կարդացեք նաև
Մյուս շահառուի՝ Կարեն Ռաշոյանի պատմությունը ոչ պակաս հուզիչ է: Նրա անսպառ աշխատասիրությունը ապացույց է, որ սեփական գործի հանդեպ սերը և համառությունն ամենահզոր գործիքներն են։ Մասիսում նրա հիմնած ձկնաբուծարանը ամեն այցից հետո էլ ավելի է բարեկարգվում, տարածքը կանաչապատվում է, ավելանում են հանգստի նոր գոտիներ և այլն: «Հիմնադրամի ֆինանսավորմամբ կառուցելու եմ փոքրիկ եռանկյունաձև տնակ, որը այցելուներին հնարավորություն կտա գիշերակացով գալ մեզ մոտ և վայելել ընտանեկան հանգիստը բնության գրկում: Կմախքն արդեն կամաց-կամաց սկսել եմ հավաքել» – մեզ հետ զրույցում նշեց Կարենը:
«Իմ քայլը» հիմնադրամի փոխտնօրեն Թալին Թօփալաքեանի հետ զրուցեցինք ծրագրի ձեռքբերումների ու արդյունավետության մասին: Նա նշեց, որ ծրագիրը այժմ գտնվում է մասնակիցների գործարար ծրագրերի ֆինանսավորման փուլում։ Բայց այսքանով ամեն ինչ չի ավարտվում.
«6 ամիս և 12 ամիս անց պարտադիր կլինեն մշտադիտարկման այցեր, որպեսզի վստահ լինենք՝ աջակցությունը եղել է թիրախային, իսկ ֆինանսավորումը ծառայել է իր իրական նպատակին»:
«Պատերազմի մասնակիցների մասնագիտական ներուժի բացահայտման ծրագիր»-ն արդեն իրականացվել է Շիրակ, Արմավիր, Լոռի, Արարատ, Վայոց ձոր, Կոտայք մարզերում: Ներկայում հիմնադրամը սկսել է աշխատել ծրագրի 4-րդ փուլի մեկնարկի ուղղությամբ՝ մնացած չորս մարզերում։ Վերջնական մարզերը կհայտարարվեն՝ կախված յուրաքանչյուր մարզում բնակվող պոտենցիալ շահառուների քանակից։
«Իմ քայլը» հիմնադրամ
