Բարձրագույն դատական խորհրդի նախկին նախագահ Ռուբեն Վարդազարյանի ֆեյսբուքյան գրառումը.
Օրեր առաջ կես կատակ, կես լուրջ անդրադարձել էի ՀՀ մարդու իրավունքների պաշտպանի Սահմանադրական դատարան ներկայացված դիմումին, կապված երկու ականջի կայուն լրիվ խլություն կամ խուլհամրություն, երկու աչքերի (բինօկուլյար) կուրություն ունեցող անձանց՝ դատավորի պաշտոնում նշանակվելու բացարձակ արգելքը վերացնելու համար:
ՄԻՊ գրասենյակի արձագանքը երկար սպասել չտվեց: Ըստ ՄԻՊ գրասենյակի՝ իմ դատողությունները խտրական են և թիրախավորում են հաշմանդամություն ունեցող անձանց: Իրականում ես թիրախավորել եմ, ոչ թե հաշմանդամություն ունեցող անձանց, այլ պոպուլիզմն ու բուռն աշխատանքի իմիտացիան:
Իսկ հիմա համառոտ ներկայացնեմ թե ինչու երկու ականջի կայուն լրիվ խլություն կամ խուլհամրություն, երկու աչքերի կուրություն ունեցող անձիք չեն կարող դատավոր աշխատել.
Կարդացեք նաև
Եթե խոսքը տրամաբանորեն մտածելու, օրենքը իմանալու և անաչառ լինելու ունակության մասին է, ապա տեսականորեն նրանք կարող են դատավոր աշխատել: Սակայն գործնականում նրանց մասնակցությունը դատական համակարգում հաճախ օրենսդրորեն սահմանափակվում է մի շարք օբյեկտիվ դժվարությունների պատճառով։
1.Տեղեկատվության ընկալման պահանջ. Դատավորը պետք է անմիջականորեն ընկալի բանավոր ցուցմունքները, դեմքի արտահայտությունները, ինտոնացիաները, վկաների և կողմերի արձագանքները։ Սա օգնում է գնահատել ցուցմունքների հավաստիությունը։
Մեր օրենսդրությունը սահմանում է, որ դատավորը պետք է անձամբ մասնակցի գործի քննությանը, ինչը ենթադրում է գործընթացի բոլոր բաղադրիչների ընկալում։
2.Տեխնոլոգիական սահմանափակումներ.
Այո, կան ժեստերի լեզվի թարգմանիչներ և խոսքը տեքստի վերածող ծրագրեր։ Սակայն դատավարությունները դինամիկ, հաճախ հուզական, բազմաձայն քննարկումներ են, որտեղ կարևոր է արձագանքել իրական ժամանակում։ Նույնիսկ լավ տեխնիկական միջոցներով, ձայնի նրբերանգները, դադարները և տատանումները կարող են կորչել, ինչը կարող է ազդել օբյեկտիվ գնահատման վրա։
3.Անվտանգություն և անկախություն.
Դատավորը պետք է կարողանա ինքնուրույն վերահսկել գործընթացը՝ թե՛ դատարանում, թե՛ դրանից դուրս։ Օգնականի կամ թարգմանչի մշտական մասնակցությունը կարող է ստեղծել դատավորի վրա ազդելու և խորհրդակցական սենյակի գաղտնիությունը խախտելու ռիսկ:
Սակայն կան բացառություններ.
Որոշ երկրներում և դեպքերում, մասնակի լսողության կամ տեսողության կորուստ ունեցող անձինք կարող են լինել դատավորներ, օրինակ՝ եթե նրանք օգտագործում են լսողական սարք կամ կարդում են շուրթերով։ Այստեղ բանալի բառը մասնակին է:
Եթե որևէ մեկին հետաքրքրեց այս թեման, պատրաստ եմ լրացուցիչ հիմնավորումներ և մեկնաբանություններ ներկայացնել:
