«Չգիտեմ կառավարությունն ինչ է հաստատել, ինչը՝ ոչ, բայց ադրբեջանական կողմն արդեն 3 օր է, պարբերաբար հնչեցնում է, որ Նիկոլ Փաշինյանը ուրբաթ օրը Վաշինգտոնում հանդիպելու է Ալիեւի եւ Թրամփի հետ: Լրագրողները փորձել էին Փաշինյանի խոսնակից մեկնաբանություն ստանալ՝ հասկանալու համար արդյոք կայանալո՞ւ է այդ այցը, սակայն ոչ մի պատասխան չէին ստացել: Կարծում եմ՝ Նիկոլ Փաշինյանը նաեւ Ադրբեջանում է խոսնակներ պահում, որոնք շատ ավելի շուտ են ազդարարում այդ այցի մասին»,- «Հայելի» ակումբում ասաց «Համահայկական ճակատ» շարժման անդամ Ռուզան Ստեփանյանը:
«Այսօր արդեն տեսանյութեր կային, որ Փաշինյանը գնում է «Զվարթնոց» օդանավակայան, որտեղից պիտի մեկնի Վաշինգտոն: Դեռ 2018թ. տարբեր շրջանակներից ահազանգ էր հնչում, որ Նիկոլ Փաշինյանը զավթում է իշխանությունը, որպեսզի հանձնի Արցախը, Սյունիքը եւ ստորագրի Հայաստանի ու Արցախի կապիտուլյացիան: Կհիշե՞ք իր պոպուլիստական ելույթները՝ «ինձ ասում են՝ եկել եմ Արցախը հանձնելու…»: Այո՛, դու հենց եկել էիր Արցախը հանձնելու, հիմա էլ իրականացնում ես հաջորդ քայլերը: Իսկ ի՞նչ է սպասվում Վաշինգտոնում այդ հանդիպումից: Շատ տարօրինակ է, որ Նիկոլ Փաշինյանն արձակուրդում գտնվելու պարագայում է գնում Վաշինգտոն՝ թուղթ ստորագրելու: Կարծես թե գաղտագողի նրա արձակուրդը երկարաձգվեց: Շատ ու շատ վերլուծաբաններ ահազանգում էին, որ այս արձակուրդի ընթացքում նա կարեւոր փաստաթղթեր է ստորագրելու: Ես եւս հիմա ահազանգ եմ հնչեցնում, որ Նիկոլ Փաշինյանը Սյունիքի վաճառքով է զբաղված, արձակուրդ է վերցրել, որպեսզի վաճառի Սյունիքը»,- ասաց «Համահայկական ճակատ» շարժման անդամը:
Գոհար ՀԱԿՈԲՅԱՆ
