«Ես չէի ուզենա փաստաթուղթն առանձնացնել օգոստոսի 8–ին Վաշինգտոնում տեղի ունեցած արարողությունից եւ դրա բոլոր տարրերից, որովհետեւ դրանք մեկ ամբողջ համալիր են կազմում: Մենք փաստացիորեն ականատես եղանք Միացյալ Նահանգների կողմից սեփական դերակատարման բացահայտմանը՝ որպես այս գործընթացների քավորի, որը ժամանակի ընթացքում փորձում էր ձեւ անել, թե ընդամենը հարթակ է տրամադրում կամ անուղղակի օժանդանդակություն է ցուցաբերում բանակցություններին, բայց իրականում ամբողջ միջնորդական ուղղորդումն իրականացվում էր Նահանգների կողմից, ինչպես նաեւ՝ նրա հետ եւ նրա ներքո գործող արեւմտյան այլ կենտրոնների»,- «Հայելի» ակումբում ասաց ՀՀ արտակարգ եւ լիազոր դեսպան Ձյունիկ Աղաջանյանը՝ անդրադառնալով Վաշինգտոնյան հանդիպմանը եւ ստորագրված փաստաթղթին:
«Արձանագրենք, որ փաստացիորեն օգոստոսի 8-ին ստորագրված, մեր բոլորի աչքի առաջ ծաղկուն կերպով բեմադրված արարողության ժամանակ ի հայտ եկան այն բոլոր խոստումները, որոնք մեր իշխանությունները տվել էին Ադրբեջանին, եւ որոնք ամրագրվեցին այդ հռչակագրում, եւ դրանից զատ նաեւ ադրբեջանական կողմի ձեռքբերումը ԱՄՆ-ից, որը դրսեւորվեց 907 բանաձեւի չեղարկման խոստումով: Ինչու եմ ասում խոստումով, որովհետեւ 907 բանաձեւը փաստացիորեն կարող է չեղարկվել միայն ԱՄՆ Կոնգրեսի միջոցով, քանի որ ընդունվել է Կոնգրեսի կողմից, եւ այստեղ մեր լոբբիստական կազմակերպություններն իրական դեր ունեն խաղալու՝ թույլ չտալու նման բանաձեւի չեզոքացումը»-նշեց ՀՀ արտակարգ եւ լիազոր դեսպանը:
Նրա խոսքով՝ ստորագրված թղթից Ադրբեջանը ստացավ Մինսկի խմբի եւ նրա հարակից բոլոր ենթակառուցվածքների չեղարկումը, նաեւ, ինչպես արդեն նշվեց, 907 բանաձեւի չեղարկման հետ կապված խոստում, ինչը պետք է դիտարկել ԱՄՆ-ի կողմից ուղիղ ռազմական օժանդակության ցուցաբերման թույլտվություն:
«Ադրբեջանական կողմի իրական մտադրությունը Արցախի հետ կապված որեւէ փաստաթղթի, բանաձեւի հնարավոր ազդեցության լծակի չեզոքացումն էր, թե երկկողմ մակարդակում, թե միջազգային հարթակներում: Այսինքն, մենք տեսանք այդ ամբողջ մոտեցման իրականացումը, որի արտացոլումը տեսանք երկկողմ հարաբերությունների նորմալացման մասին փաստաթղթում, որի մեջ ներառված է նաեւ միջազգային ատյաններից հայցերի հետ կանչումը: Ադրբեջանական կողմը ստացավ այն ամենը, ինչ իրեն խոստացվել էր հայկական կողմից, եւ հայկական իշխանությունների այդ խոստումն իրականություն դարձնելու համար ֆորմալացում էր պետք՝ նախքան որեւէ փաստաթղթի ստորագրումը, ինչին իրենք հասան նախաստորագրման միջոցով: Նախաստորագրման գաղափարը եւս հայկական կողմն էր առաջարկել: Միջանցքի հետ կապված փաստացի համաձայնությունները ձեռք են բերվել արեւմտյան հովանու ներքո, եւ մենք ականատես ենք լինում, որ նախաստորագրման միջոցով փաստացիորեն իրավական հենք է տրվում բոլոր նախորդ ձեռք բերված հանձնառություններին եւ համաձայնություններին»,-ընդգծեց Ձյունիկ Աղաջանյանը:
Կարդացեք նաև
Գոհար ՀԱԿՈԲՅԱՆ
