Սյունիքի մարզի ընդհանուր իրավասության դատարանի դատավոր Գոռ Գասպարյանի նախագահությամբ դատարանի Գորիսի նստավայրում օգոստոսի 13-ին սկսվեցին Տաթեւի վարչական ղեկավար Գոռ Մինասյանի քրեական վարույթով նախնական դատալսումները։
Բացի վարչական ղեկավարից, մեղադրյալի աթոռին է նաեւ եւս մեկ հոգի՝ Գեւորգ Հարությունյանը։
Վերջինիս մեղադրանք է առաջադրվել ՀՀ քրեական օրենսգրքի երեք հոդվածների հատկանիշներով․ 171 հոդվածի 2-րդ մասի 5-րդ կետ (առողջությանը թեթեւ վնաս պատճառելը՝ մի խումբ անձանց կողմից), 207 հոդվածի 1-ին մաս (բնակարանի անձեռնմխելիությունը խախտելը), 297 հոդվածի 2-րդ մասի 1-ին կետ (խուլիգանությունը, որը կատարվել է մի խումբ անձանց կողմից ):
Կարդացեք նաև
Գոռ Մինասյանին նույնպես երեք հոդվածով է մեղադրանք առաջադրվել՝ 171 հոդվածի 2-րդ մասի 5-րդ կետ, 297 հոդվածի 2-րդ մասի 1-ին կետ եւ 264 հոդվածի 2-րդ մասի 5-րդ կետ (գույքը ոչնչացնելը կամ վնասելը, որը կատարվել է խուլիգանական դրդումներով):
Տուժողներից մեկն էր ներկայացրել՝ Մարո Մարտիրոսյանը, մյուսը՝ Լուսիկ Միքայելյանը չնայած չէր ներկայացրել նիստին, բայց դատավարական կողմերը որոշեցին շարունակել նիստը, քանի որ պիտի քննարկվեր մեղադրյալների խափանման միջոցի հարցը։
Հանրային մեղադրող Գոռ Մանուչարյանը միջնորդեց մեղադրյալների կալանքը երկարաձգել եւս երեք ամսով։ Ըստ մեղադրող կողմի՝ նրանք ազատության մեջ կխոչընդոտեն արդարադատությանը, ճնշում կգործադրեն վկաների ու տուժողների վրա։
Կալանավորումը երկարաձգելու միջնորդություն ներկայացրեց նաեւ տուժող Մարո Մարտիրոսյանի պաշտպան Լիանա Գրիգորյանը։
Գեւորգ Հարությունյանի պաշտպանը միջնորդեց կիրառել գրավ 5 մլն դրամի չափով ու տնային կալանք։ Հարությունյանը հայտարարեց, որ հարազատները ի վիճակի են գրավը վճարելու։ Գոռ Մինասյանի պաշտպան Արտակ Նավասարդյանը մասնավորապես նշեց, որ 2023թ հոկտեմբերից Գոռ Մինասյանի մասին՝ վերջինիս ընկերների, հարազատների եւ այլոց շրջանում ստահոդ տեղեկություններ են տարածում։ «Գոռ Մինասյանի ինտիմ կյանքի, նրա եւ այլ անձանց հետ «սիրային» ենթադրյալ հարաբերություններ ունենալու եւ այլն, եւ այլն։
Այսինքն, պատիվն ու արժանապատվությունը նսեմացնող, հոգեկան տառապանք պատճառող տեղեկություններ է շրջանառվում ամբողջ վարչական շրջանում»,-նշեց փաստաբան Արտակ Նավասարդյանը։ Այս դեպքերի առնչությամբ հաղորդումներ են ներկայացվել իրավապահ մարմիններին, որոնք ըստ պաշտպանի, ոչինչ չեն ձեռնարկել։
Պաշտպանական կողմը հաշվի առնելով Գոռ Մինասյանի ընտանեկան վիճակը, ինչպես նաեւ վատառողջ լինելը, դատարանին միջնորդեց կիրառել վարչական վերահսկողություն եւ 10 մլն դրամ գրավ։ Ընդ որում՝ հայտարարվեց, որ դատարանը կարող է ողջամիտ սահմանում գրավի չափն ավելացնել։
Դատարանը, դատավոր Գոռ Գասպարյանի նախագահությամբ որոշեց երկու մեղադրյալների խափանման միջոց կալանքը թողնել ուժի մեջ՝ այն երկարաձգելով եւս երկու ամսով։ Որոշումը կարող է բողոքարկվել վերաքննիչ քրեական դատարան։
Հիշեցնենք, որ Գոռ Մինասյանն ու Գեւորգ Հարությունյանը կալանավորվել են հունիսի 20-ին:
Նշենք, որ առավոտվանից բազմաթիվ քաղաքացիներ էին հավաքվել Սյունիքի մարզի ընդհանուր դատարանի Գորիսի նստավայրի առաջ՝ ի պաշտպանություն Տաթեւի վարչական ղեկավար Գոռ Մինասյանի ու մյուս մեղադրյալ Գեւորգ Հարությունյանի։
Հաջորդ դատական նիստը օգոստոսի 25-ին է։
Արմեն ԴԱՎԹՅԱՆ
