«Սամվել Կարապետյանին կոռուպցիոն բնույթի մեղադրանք չեն մեղսագրում․ տնտեսական բնույթի մեղադրանք է՝ փողերի լվացում, հարկեր, տուրքեր չվճարել։ Այդտեղ արձանագրվեց, որ հիմնավոր կասկածն առկա չէ, բայց միաժամանակ նաև կալանավորումը՝ որպես խափանման միջոց պահպանելով՝ կարող ենք միայն արձանագրել, որ սա իրականում արդարադատության տոտալ բացակայություն է»,- լրագրողների հետ ճեպազրույցում ասաց Սամվել Կարապետյանի փաստաբան Արամ Վարդևանյանը՝ անդրադառնալով նրա կալանքը ևս երկու ամսով երկարաձգելու որոշմանը։
Հիշեցնենք՝ «Տաշիր» խմբի ընկերությունների սեփականատեր, ռուսաստանաբնակ հայ գործարար, բարերար Սամվել Կարապետյանի կալանքը երկարաձգելու միջնորդության քննությունը երեկ տևեց 10 ժամից ավելի։ Ինչպես արդեն տեղեկացրել ենք, դատարանը որոշեց ևս երկու ամսով երկարաձգել կալանքը։
Նա վստահեցրեց՝ Սամվել Կարապետյանի հարցազրույցը կարող ենք տալ ցանկացած անաչառ դիտորդի, թող ասի՝ այդտեղ կոչ կա՞, թե՝ ոչ․ «Հարցազրույցը դիտարկել կոչ աբսուրդ է։ Չգիտեմ՝ ոնց է դա ստացվում իրենց մոտ։ Դատավոր Տիգրան Դավթյանի մոտ ո՞նց է ստացվել այդ հարցազրույցում տեսնել իշխանության բռնազավթելու կոչ, ես չեմ պատկերացնում»։
Կարդացեք նաև
Ըստ Արամ Վարդևանյանի՝ դատավոր Տիգրան Դավթանի դեպքում պետք է արձանագրենք, որ նա իրավունքը ստորադասեց քաղաքական գործընթացներին․ «Այս դատական ակտի պայմաններում այդտեղ իրավունք տեսնել հնարավոր չէ։ 55 օրից ավելի կալանավորված անձին միջին ծանրության ենթադրյալ հանցանքի համար ասել, որ ևս երկու ամսով պետք է շարունակվի այդ կալա՞նքը… Իրավունքը, միևնույն է, գերակայելու է։ Համանման մոտեցում վստահաբար ունի նաև Սամվել Կարապետյանը։ Այդ առումով ուղղակի ժպիտով կվերաբերվենք այս ամենին։ Իրավունք խախտելը, ի վերջո, միշտ էլ պատասխանատվություն ենթադրում է․ դա անխուսափելի է»։
Տաթև ՀԱՐՈՒԹՅՈՒՆՅԱՆ
