«Միջնորդում ենք դադարեցնել գերաշնորհ Միքայել արքեպիսկոպոս Աջապահյանի նկատմամբ հարուցված քրեական հետապնդումը»,- Միքայել արքեպիսկոպոս Աջապահյանի գործով դատական նիստի ժամանակ նման միջնորդություն ներկայացրեց փաստաբան Երեմ Սարգսյանը։ Նա ծավալուն ներկայացրեց այն հիմքերը, թե ինչու պետք է դադարեցնել Միքայել սրբազանի նկատմամբ քրեական հետապնդումը։
Դատարանը մերժեց այս միջնորդությունը։
Դատարանը մերժեց նաեւ Միքայել սրբազանի վերաբերյալ գործը Շիրակի մարզի առաջին ատյանի դատարանին փոխանցելու միջնորդությունը։ Միքայել Սրբազանի պաշտպան Արա Զոհրաբյանը միջնորդեց դատարանին այս գործը փոխանցել Շիրակի դատարան, բայց դատավոր Արմինե Մելիքսեթյանն ասաց, որ դատարանը մերժում է միջնորդությունը։
Կարդացեք նաև
Նշենք, որ Երեւանի առաջին ատյանի ընդհանուր իրավասության քրեական դատարանի Ավան նստավայրում ընթանում է Հայաստանյայց առաքելական սուրբ եկեղեցու Շիրակի թեմի առաջնորդ Միքայել արքեպիսկոպոս Աջապահյանի գործով առաջին դատական նիստը։
Ըստ հրապարակված մեղադրական եզրակացության՝ «Գևորգ /Միքայել/ Արտաշեսի Աջապահյանին մեղադրանք է առաջադրվել այն բանի համար, որ նա ունենալով արքեպիսկոպոսի հոգեւոր աստիճան եւ հանդիսանալով Հայ Առաքելական Սուրբ Եկեղեցու Շիրակի թեմի առաջնորդը, պարբերաբար հրապարակային ելույթներով հանդես գալով զանգվածային լրատվության միջոցներով, ունենալով մեծ թվով հետեւորդներ եւ հետեւաբար նաեւ՝ իր խոսքով հասարակության անդամների վարքագիծն ուղղորդելու զգալի հնարավորություն, համաձայն չլինելով ներքին եւ արտաքին քաղաքականության հետ կապված հարցերի վերաբերյալ ՀՀ կառավարության դիրքորոշումների հետ, օգտագործելով զանգվածային լրատվության միջոցները, տեղեկատվական ու հաղորդակցական տեխնոլոգիաները, նախ՝ 2024 թվականի փետրվարի 3-ին՝ ապա նաեւ՝ 2025 թվականի հունիսի 21-ին, զանգվածային լրատվության միջոցների ներկայացուցիչներին տրված հարցազրույցների ընթացքում հնչեցրել է իշխանությունը զավթելուն ուղղված հրապարակային կոչեր»։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
