Օգոստոսի 15-ին ՀՀ սփյուռքի գործերի գլխավոր հանձնակատար Զարեհ Սինանյանն ընդունել է Ֆրանսիայում Հայաստանի և Հայ դատի պաշտպանության ճակատ (FDACAF) ասոցիացիայի նախագահ, ինչպես նաև «Laïcité et République Sociale» կազմակերպության նախագահ Ադրիեն Վահագն Սաժին։
Ադրիեն Վահագն Սաժը, ով ակտիվ հասարակական գործունեություն է ծավալում՝ ուղղված Ֆրանսիայում հայկական շահերի պաշտպանությանը և Հայաստան–Ֆրանսիա կապերի խորացմանը, հանդիպման ընթացքում շնորհավորել է օգոստոսի 8-ին Վաշինգտոնում Հայաստանի և Ադրբեջանի միջև խաղաղության ու միջպետական հարաբերությունների հաստատման մասին համաձայնագրի համաձայնեցված տեքստի նախաստորագրման կապակցությամբ։
Նա վստահություն է հայտնել, որ խաղաղության հաստատումը կբացի նոր հորիզոններ Հայաստանի համար՝ խթանելով երկրի տնտեսական զարգացումը, սոցիալական բարեփոխումները և միջազգային ներդրումների ներգրավումը։
Գլխավոր հանձնակատար Զարեհ Սինանյանն իր խոսքում ևս ընդգծել է վերջերս Վաշինգտոնում կայացած հանդիպման և համաձայնագրի նախաստորագրման կարևորությունը տարածաշրջանում խաղաղության հաստատման հարցում և հավելել, որ այս իրադարձությունը ոչ միայն նոր էջ է բացում Հայաստանի համար, այլ նաև կարևոր քայլ է Հայաստան–ԱՄՆ հարաբերությունների զարգացման հարցում:
Կարդացեք նաև
Հանդիպման ընթացքում կողմերը քննարկել են Հայաստան–Ֆրանսիա համագործակցության ընդլայնման հեռանկարները, սփյուռքի ներգրավվածության նոր ձևաչափերը և համատեղ նախաձեռնությունների իրականացման հնարավորությունները։
Սփյուռքի Գլխավոր Հանձնակատարի Գրասենյակ
