Երեւանի առաջին ատյանի ընդհանուր իրավասության քրեական դատարանի Ավան նստավայրում Հայաստանյայց առաքելական սուրբ եկեղեցու Շիրակի թեմի առաջնորդ Միքայել արքեպիսկոպոս Աջապահյանի գործով դատավարությունը շարունակվում է դռնփակ։
Դատարանը դռնփակ ռեժիմով քննարկում է հետեւյալ հարցը՝ այս գործով հիմնական դատալսումները դռնբաց են անցկացվելու, թե՞ դռնփակ։ Դատավորը պահանջեց, որպեսզի լրատվամիջոցները լքեն նիստերի դահլիճը։
Դատարանը բավարարեց պաշտպանական կողմի միջնորդությունը՝ ընդլայնել Միքայել սրբազանին տեսակցելու իրավունք ունեցողների շրջանակը։ Կարգելվի միայն ԶԼՄ-ների ներկայացուցիչների հետ հանդիպումը։
Կարդացեք նաև
Դատավորն ասաց․ «Քննարկելով պաշտպանական կողմի միջնորդությունը՝ տեսակցությունը սահմանափակումը վերացնելու կամ լայնացնելու գրություն կուղարկվի քրեակատարողական հիմնարկ։ Այն է՝ սահմանափակել մեղադրալի տեսակցությունը միայն զանգվածային լրատվության միջոցների հետ»։
Ըստ հրապարակված մեղադրական եզրակացության՝ «Գևորգ /Միքայել/ Արտաշեսի Աջապահյանին մեղադրանք է առաջադրվել այն բանի համար, որ նա, ունենալով արքեպիսկոպոսի հոգեւոր աստիճան եւ հանդիսանալով Հայ Առաքելական Սուրբ Եկեղեցու Շիրակի թեմի առաջնորդը, պարբերաբար հրապարակային ելույթներով հանդես գալով զանգվածային լրատվության միջոցներով, ունենալով մեծ թվով հետեւորդներ եւ հետեւաբար նաեւ՝ իր խոսքով հասարակության անդամների վարքագիծն ուղղորդելու զգալի հնարավորություն, համաձայն չլինելով ներքին եւ արտաքին քաղաքականության հետ կապված հարցերի վերաբերյալ ՀՀ կառավարության դիրքորոշումների հետ, օգտագործելով զանգվածային լրատվության միջոցները, տեղեկատվական ու հաղորդակցական տեխնոլոգիաները, նախ՝ 2024 թվականի փետրվարի 3-ին, ապա նաեւ՝ 2025 թվականի հունիսի 21-ին, զանգվածային լրատվության միջոցների ներկայացուցիչներին տրված հարցազրույցների ընթացքում հնչեցրել է իշխանությունը զավթելուն ուղղված հրապարակային կոչեր»։
Ռոզա ՀՈՎՀԱՆՆԻՍՅԱՆ
