Երգ-երաժշտություն, ավանդական պարեր, ցուցադրություններ, մարզական խաղեր, տոնավաճառ․ «Գորիսյան օրեր» խորագրով ավանդական միջոցառումներ են։ Գորիսի կենտրոնական Մաշտոցի փողոցում ապրողները իրենց տների առաջ սեղան են բացել, անցնող-դարձողներին են հյուրասիրում։
Մթնոլորտը ջերմ է, օրվա խորհուրդը՝ տոնական։ Սյունիքի մարզպետ Ռոբերտ Ղուկասյանը, մարզի այլ համայնքների ղեկավարները, քույր-քաղաքների ներկայացուցիչները՝ տանտիրոջ Գորիս համայնքի ղեկավար Առուշ Առուշանյանի ուղեկցությամբ մոտենում են յուրաքանչյուր սեղանին, բաժակները իրար զարկում, շնորհավորում, բարեմաղթանքներ հղում միմյանց։
Կարդացեք նաև
Իսկ վաղ առավոտյան բոլոր հյուրերը Ակսել Բակունցի տուն թանգարանում էին։ Կյորեսի խորհրդանշական կերպարը ամփոփված է այստեղ։ Բակունցի հերոսներն են դիմավորում բոլորին։
«Բա Գուսան Աշոտը հի՞նչ էր ասում։ Հա՝ Կյորեսը մի ուրիշ քաղաք ա, մի ուրիշ աշխարհ ա, էս սարերը, ա՛յ Աթա, մինակ հող ու ծյուր չեն, կյանք են։ Հազար տարվա պատմություն ունեն, հինչքան փիս պյան են տեսալ հինչքան լավ պյան են տեսալ, էլի մնացել ես իրենց տեղը կանգուն ու հպարտ», -ներկայացնում են Բակունցի հավաքական կերպարները։
Հարեւան՝ Իրանի Իսլամական Հանրապետության Նային քաղաքի պատվիրակներն են լսում թարգմանությունը, հետո ընդհատում թարգմանչին՝ ասելով, որ հասկացան․ խոսքը հյուրընկալության ու գորիսեցու ուժեղ կերպարի մասին է։ «Ես ու Գորիսի համայնքապետ Առուշ Առուշանյանը դարձանք եղբայրներ, իսկ մեր քաղաքները` քույրեր»- ասում է Նայինի քաղաքապետ Հասան Շաֆին։
«Մեր երկու երկրների մշակութային կապը շատ հեռավոր անցյալ ունի ես ինձ այստեղ շատ ազատ եմ զգում, քանի որ կարծես մեր նույն մշակութային միջավայրը լինի։ Երկու օր է՝ այստեղ ենք, զգացվում է, որ քաղաքի ղեկավարությունը սրտացավ է․ բարեկարգվում են փողոցները, կազմակերպվում են մշակութային միջոցառումներ։ Դե՛, Գորիսի ժողովուրդն էլ շատ ակտիվ ու եռանդուն է»,-լրագրողների հետ ճեպազրույցում նշում է Հասան Շաֆին։
Գորիս համայնքի ղեկավար Առուշ Առուշանյանը ներկայացնում է համայնքում կատարվող աշխատանքները՝ շեշտելով բնակարանաշինության ծրագրերը։ Պետական աջակցությամբ, մինչև 16 միլիոն դրամի 300 շինարարական թույլտվություն է տրամադրվել։ Գորիս քաղաքում նաև հյուրանոցային բիզնեսն է զարգանում, ներգաղթ կա նույնիսկ։
«Մենք հյուրասեր ենք, մենք ուժեղ ենք, մենք կռվող ենք։ Ինձ թվում է՝ արդեն ամեն ինչ ասված է։ Ոչ միայն գորիսեցիներին, այլ մեր ողջ ժողովրդին հավատք, հայրենիք, ընտանիք եմ մաղթում։ Այս արժեհամակարգում պիտի ապրենք»,-իր խոսքը եզրափակեց Առուշ Առուշանյանը։
Մանրամասները տեսանյութում։
Արմեն ԴԱՎԹՅԱՆ
