ՆԺԱՐ նորաստեղծ սահմանադրական շարժումը այս աշնանը կներկայացնի Սահմանադրական փոփոխությունների իրենց փաթեթը: Այսօր այս մասին լրագրողների հետ հանդիպման ժամանակ հայտարարեց ՆԺԱՐ-ի հիմնադիրներից Գարեգին Միսկարյանը:
Մինչ ներկայացնելը լրագրողները հետաքրքրվեցին՝ ինչ փոփոխություններ են առաջարկում:
Կարդացեք նաև
«Առաջինը՝ Սահմանադրական երաշխիքներով ինքնորոշման ազգային ինստիտուտի հիմնադրումն է, որը ձեւավորելու է Հայաստանում քաղաքական ու քաղաքացիական շերտերի ձեւավորմանը: Տարիներ շարունակ այն, ինչ կատարվել է ՀՀ-ում այդ ոլորտում, քաղաքական շերտը ծառայել է վճարողի շահին, ոչ թե պետական շահին: Իսկ քաղհասարակության մասով մի կողմից զարգացում նկատվել է, բայց շատ անարդյունավետ եւ թույլ քայլերով է առաջ գնացել: Այդ ինստիտուտի նպատակը լինելու է նաեւ ռազմավարական ծրագրերի մշակումը, եւ խորհրդատվությունը օրվա իշխանություններին: Մյուս կարեւոր փոփոխությունը վերաբերում է պետական խորհրդի ինստիտուտի ներդրմանը պետական կառավարման մեջ: Դա, մեր գնահատմամբ, այն պակասող օղակն է, որը փխրուն ժողովրդավարություն ունեցող պետությունների համար կարող է լինել որպես, չասեմ փրկություն, բայց արդյունավետության կտրուկ բարձրացում կառավարման հարցում հակակշիռների ձեւավորման մեջ: Սրանք հիմնական երկու փոփոխություններն են, բայց կան նաեւ այլ առաջարկներ: Մենք Սահմանադրական փոփոխությունների փաթեթը կներկայացնենք հոկտեմբեր- նոյեմբերին» ,- պատասխանեց Միսկարյանը:
Նա նաեւ նկատեց, որ գործող իշխանությունները ոչնչով չեն տարբերվել նրանցից, ում քննադատել են. «Արցախը պահելը միայն ՀՀ ինքնիշխանությունը վաճառելու գնով, Արցախ պահել չէ: Մենք խնդիրը ախտորոշել են հետեւյալ կերպ՝ ՀՀ համակարգային ճգնաժամի պատճառը գոյություն ունեցող կառավարման կառուցվածքի, մշակույթի մեր ազգային մշակույթի ու առաջարկվող մոդելների մեջ գոյություն ունեցող ճեղքն է: Մենք փորձում ենք Սահմանադրական փոփոխության մեր մոդելով լրացնել այդ ճեղքը»:
Անդրադառնալով շարժման հիմնադիրներից Արտաշես Իկոնոմովի հայտարարությանը, թե իրենք գալիս են ոչ թե բաժանելու, այլ միավորելու, պարոն Միսկարյանը շարունակեց. «Դա նշանակում է՝ ժողովրդի հետ հարաբերություններում էդ գիծը նախկին-ներկա անձնավորված չի լինելու: Քաղաքական գնահատականը տվել ենք անցյալին, մենք առաջարկում ենք այդ գնահատականով փակել անցյալի էջը ու քաղաքական առումով նայել ապագային, խոսել ծրագրերի ու անելիքների մասին, ինչը տեւական ժամանակ Հայաստանում բացակայել է»:
Արփինե ՍԻՄՈՆՅԱՆ
