Ողբերգականօրէն ծիծաղելին այն էր, որ իւրաքանչիւր կորուստ՝ ժողովուրդին կը հրամցուէր «տեսէ՛ք թէ ի՜նչ նուաճում ըրինք»ի յոխորտանքով: Նոյնը կ՛ըլլայ հիմա: Այլ խօսքով, նուաճո՜ւմ էր Արցախի յանձնումն ու Ատրպէյճանի մաս ճանչնալը, նուաճո՜ւմ եղաւ արցախցիներու բռնագաղթն ու մայր հայրենիքին մէջ իրողական անտիրութիւնը, նուաճումներու շարքին եղան բանակին թուլացումը, դիւանագիտական անդամալուծութիւնը, տնտեսութեան այս կամ այն կալուածին մէջ նահանջներն ու կորուստները: Փանջունին իսկ նախանձով պիտի լսէր այս բոլորը…
Հիմա, 8 Օգոստոսէն ասդին, նոյն «տրամաբանութիւնը» դարձեալ կը բանի իշխանաւորին ու մանկլաւիկներուն սուտ քարոզչութեան ճամբով: Դարձեալ բանիմաց մարդիկ (չկրկնենք մասնագիտութիւններուն շարքը) «մատները մարդոց աչքին կոխելու» մօտեցումով ցոյց կու տան, թէ Թրամփի իրաւարարութեամբ եւ սկզբնատառերով ստորագրուած համաձայնութիւնը լիարժէք… նոր աղէտ է Հայաստանի ու հայութեան համար: Մէկ չէ, երկու չէ, այլ բազմաթիւ իրազեկներ ու մասնագէտներ բզիկ-բզիկ կ՛ընեն ծանօթ փաստաթուղթը, յօդուածները մէկ առ մէկ կը պարզաբանեն (գրուածին խորքը կը թափանցեն), ցոյց տալու՝ որ անիկա խաղաղութիւն պիտի չբերէ, շահաբեր պիտի չըլլայ Հայաստանի համար (իսկ եթէ ամերիկացիք ու ատրպէյճանցիները՝ թուրքերուն հետ մէկտեղ, շահեր ապահոված են, այդ կը նշանակէ, թէ Հայաստան ու հայութիւնը արդէն նոր կորուստի ճամբան բռնած են): Այս զգուշացումները, աղաղակող փաստերու ցանկագրումն ու աւելի եւս մթագնող հորիզոնները ոչինչ կ՛ըսեն իրենց ուղեղները իշխանաւորներու լուացքի մեքենային յանձնած՝ այլապէս բարեմիտ զանգուածին: Եւ երեւակայե՜լ, որ դարձեա՛լ կը հնչեն այն տեսակէտները, թէ՝ հասած է 9 Նոյեմբերի յայտարարութեան… երանի տալու օրը:
Իրատեսը կը նկատէ, որ այս համաձայնագիրով, Հայաստանը փաստօրէն կը դառնայ Ատրպէյճանի ԲՈԼՈՐ քմայքներուն ու պահանջներուն ընդառաջող, ստրկամտութիւնը կը համակէ զանգուածը:
Ե՞լքը: Խորտակե՛լ ուղեղալուացքի մեքենան ու իշխանութեան բերել նախկին ու նոր հայրենապաշպանները: Յառաջիկայ տարուան ընտրութիւններու խաղն ալ պէտք է դուրս նետել լուացքի մեքենայէն ու գործել անյապաղ:
Կարդացեք նաև
Ս. ՄԱՀՍԷՐԷՃԵԱՆ
Հոդվածն ամբողջությամբ՝ «Ասպարեզ» թերթում:
Նկարը գեներացված է արհեստական բանականության միջոցով:
