Արցախի Հանրապետության նախագահին առընթեր հակաճգնաժամային խորհուրդը գլխավորած Տիգրան Պետրոսյանի ֆեյսբուքյան գրառումը
Հայաստանի վարչապետ Նիկոլ Փաշինյանին,
Լսեցի Ձեր ուղերձը ժողովրդին, որում անդրադարձել եք նաև մեզ, արցախցիներին՝ ներկայացրել մեր ապագայի մասին իշխանության պատկերացումը, ըստ որի արցախցիները Հայաստանի ու միջազգային հանրության աջակցությամբ պետք է տնավորվեն Հայաստանում, այստեղ ապրեն, ստեղծագործեն և հաստատվեն որպես Հայաստանի լիարժեք քաղաքացի։
Արցախի էթնիկ զտումից անցել է գրեթե երկու տարի, այս ժամանակաշրջանում իրագործվել են տարբեր ծրագրեր, սակայն մինչ հիմա առկա են բազմաթիվ խնդիրներ, որոնք խոչընդոտ են հանդիսանում Ձեր կողմից ներկայացված մեր ապագայի մասին պատկերացմանը։
Այս ամենի պատճառն այն է, որ չկա ՀՀ իշխանություն – արցախահայեր կապը, ինչը, հավաստիացնում եմ Ձեզ, մեծ խոչընդոտ է՝ Հայաստանում արցախահայերի հաստատմանը, ինչը կասկածներ է առաջացնում արցախցիների մեջ՝ Հայաստանի իշխանությունների կողմից միտումնավոր անտեսվելու, արցախահայերին այստեղից «լարելու» համար։
Կարդացեք նաև
Արցախահայերի այստեղ տնավորումը համարում եմ Հայաստանի ներքին ամենալուրջ խնդիրներից, որից կախված է նաև Հայաստանի ապագան, ուստի որպես Արցախում ծնված, էթնիկ զտման ենթարկված, խնդրում և պահանջում եմ՝ հանդիպում կազմակերպել մի խումբ (4-5 հոգի) արցախցիների հետ, լսել նրանց խնդիրներն ու մտահոգությունները, մտքերն ու առաջարկները, ցույց տալ, որ արցախցին անտեսված չի, որ իշխանությունները մտահոգված են այդ հայերի ճակատագրով, վերջապես այս ամենը բխում է Հայաստանի շահերից, Հայության շահերից։
Պարոն Փաշինյան, խնդրում եմ այս գրառումս որպես դիմում ընդունել, հորդորում եմ Ձեզ կազմակերպել այդ հանդիպումը, ճիշտ չի լինի՝ Հայաստանի իշխանությունների հետ չհանդիպած, դիմենք Ձեր կողմից ուղերձում նշված միջազգային հանրությանը՝ տնավորման, հաստատման հարցեր քննարկելու…
Հայաստանի Հանրապետության լիիրավ քաղաքացի՝ Տիգրան Պետրոսյան
