ԱԺ նախագահ Ալեն Սիմոնյանը ֆեյսբուքյան իր էջում տեսանյութ է հրապարակել և գրել.
«Որ ասում ենք Աստծո տունը վերածել եք չուլանի, աղբ եք պահում… Իսկ մոմի բիզնեսը կառուսելի եք վերածել: Մարդը գա, փողը տա, մոմը դնի, կեսը մնա ջրի տակ ու հավաքեք, նորից ծախեք, նորից գա, նորից ծախեք, հետո նորից գա, նորից ծախեք, ծախեք, փող գա, փո՛ղ, փո՛ղ:
Արա, բա շորերներդ էիք ճղում, Տավուշի մի եկեղեցու կողքով սահման էր անցնում, հիշեցիք, վազեցիք նկարվելու: Բա էն ֆեյսբուքյան հավատացյալները, որ մի օր կաթոլիկ ֆրանկ են, մի օր ուղղափառ են, իսկ նկարների տեղը խաչ ու եկեղեցի է, բա դրանք ո՞ւր են:
Ինչո՞ւ վերջապես քաղաքական միտինգներ անող ու դատարանների դիմաց հավաքվող, անիծող և գլուխ կտրող քահանաները երթով չեն գնում Տավուշ, հետները սպիտակ շապիկով ու կեպկայով մի քանի մարդ տանեն, իրանց ձևով մաքրեն Աստծո տունը:
Կարդացեք նաև
Ո՞ւր է Կտրիճ Ներսիսյանը:
Էս ինչի՞ եք վերածել մեր եկեղեցին:
Մատթէոս 21:13. «Գրուած է. Իմ տունը աղօթքի տուն պիտի կոչուի. իսկ դուք անոր դարձուցիք ավազակներու որջ»:
Հաղարծնի վանք. 10-րդ դարի հայկական վանական համալիր, Հայաստանի Տավուշի մարզում:
Տեսանյութը՝ 26.07.2025թ.»:
Հաղարծին վանքի հոգևոր հովիվ արժանապատիվ Տեր Արտակ քահանա Միրզոյանի պատասխանը ԱԺ նախագահ Ալեն Սիմոնյանին. «Դուք մեր Սուրբ Եկեղեցով մտահոգ չեք, իբրև ձեր Մայր Եկեղեցու, այլ փորձում եք սևացնել, թուլացնել և իբրև ժամկետ ձեր առջև դրել եք 2026թ․ ընտրությունները «Ասում ենք, ասում ենք, ասում ենք․․․»․ ի՞նչ եք ասում, մինչև օրս Ամենայն Հայոց Հայրապետին դիմելու ձև ու պահվածք չունեք, ինչ էլ ցանկանում եք ասել, ձեր իրական ցանկությունը երևում է ձեր ճղճիմ հրապարակումների տակ տեղ գտած ձեր ֆեյքերի ֆաբրիկայի քոմենթներից։
«Եկեղեցին պիտի հարկվի․․․»․ բազմիցս ասվել է, որ եկեղեցին ՀՀ 1000 խոշոր հարկատուների ցուցակում է։
Այն, ինչ նկարահանել եք, անգամ այստեղ եք մանիպուլացնում կամ չեք հասկանում, որ տարբերակեք եկեղեցին գավիթից։
Չգիտեմ՝ «արա»-ով ում եք դիմում, դե, դուք ձեզ հետ եք խոսում, այդ պատճառով չեմ պատասխանում, բայց եթե օրվա մի մասը ՀՀ Ազգային ժողովի նախագահ եք, մի մասն էլ՝ փողոցի տղա, հստակեցրեք, որ շփման մեջ ձեզ դիմելու ձևը հստակեցնենք մեզ համար։
Տավուշի ձեր մատնանշած «մի եկեղեցին» Ոսկեպարի 7-րդ դարի Սբ․ Աստվածածին եկեղեցին է, որի մուտքից հարավ, ընդամենը 15 քայլ այն կողմ, կանգնած է ձեր սիրելի Ադրբեջանի զինվորը, սակայն, այդ ամենով հանդերձ, եկեղեցում մատուցվում է Սուրբ Պատարագ, և մեր ժողովրդին հաղորդակից ենք դարձնում մեր Տեր Հիսուս Քրիստոսին։
Սուրբ Մատթեոս Ավետարանչի 21:13․ «Գրված է․ Իմ տունը աղոթքի տուն պիտի կոչվի, իսկ դուք այն դարձրեցիք ավազակների որջ»։ Այո, թող ների Աստված, եթե 26.07.2025թ․-ին այստեղ եղել եք շատ անձանցով և մեր աչքից աննկատ։
Հստակեցրեք ձեզ համար՝ ով եք․ եթե իրոք Հայ Առաքելական Եկեղեցու զավակ եք, ինչպես որ ասում եք, մոտեցեք, խոստովանվեք և ապաշխարեք»:
