«Լիդիա Մանթաշյանի կալանքը երկարաձգելուց հետո հույս ունեի այսօր այստեղ տեսնել ՀՀ-ում հավատարմագրված եվրոպական որևէ դեսպանության ներկայացուցիչ, քաղաքացիական հասարակության սեկտորի ներկայացուցիչներին, որոնք նախկին իշխանության ժամանակ, եթե նման խայտառակ ֆարս լիներ, գետնին պառկած կլինեին»,- Բագրատ արքեպիսկոպոս Գալստանյանի և մյուսների վերաբերյալ քրեական գործով (նախագահող դատավոր Կարեն Ֆարխոյան) դատական նիստի ընթացքում դատարանի բակում լրագրողների հետ զրույցում հայտարարեց «Ժողովրդավարություն եւ անվտանգություն» ՀԿ նախագահ Նաիրա Զոհրաբյանը։
Ըստ նրա՝ այս դատավարություններն ամենավերջին քաղաքական հետապնդումներն են․ «Հասկանում եմ, որ Նիկոլն ունի ֆուլ քարտ բլանշ ցանկացած գնով ճանապարհ հարթել իր վրա դրված ճանապարհային քարտեզը իրականացնելու համար։ Այդ ցանկացած գինը հիմա տեսնում ենք այստեղ, երբ պոլի փետ, միկրոալիքային վառարան, չգիտեմ ինչ առգրավելով՝ մարդկանց մեղադրում են զինված հեղափոխության կազմակերպման մեջ։ Մոնտաժված ձայնագրությամբ բառերի մանիպուլյացիայով, որով փորձեցին Նիկոլի ընտրազանգվածի անպաշտպան ականջների մեջ սողոսկել ահաբեկչության փորձ, տեսանք, թե ինչպես այդ ամենը փլվեց»։
Ըստ Նաիրա Զոհրաբյանի՝ դատարան գալով, գրառում անելով հարց չի լուծվելու․ լուծում է պետք։
Կարդացեք նաև
Անդրադառնալով լրագրողների այն դիտարկմանը՝ փաստորեն ՀՀ վարչապետ Նիկոլ Փաշինյանը չի բացառում, որ կարող է և լինեն արտահերթ ընտրություններ, Նաիրա Զոհրաբյանն արձագանքեց․ «Նիկոլ Փաշինյանն ինքը ոչինչ չի որոշում, խնդիրը դրված է փոխել ՀՀ սահմանադրությունը։ Այս իրավիճակում Նիկոլ Փաշինյանը չի կարող ստանալ 650 հազար ձայն, ուստի նրան պետք է ամենահամով, ամենակոմֆորտ, ժողովրդի ականջների համար ամենաընկալելի դեսերտը՝ խաղաղություն բառը ուտացնելով՝ գնալ հնարավոր ընտրության։ Ալիևն ասաց՝ չեմ սպասելու, ունես տնային աշխատանք կատարելու։ Ուստի թեև թվում էր անտրամաբանական, որ ինքը կգնա արտահերթի, բայց քանի որ իր քայլերն ինքը չի որոշում, ես չեմ բացառում, որ այո՝ իր առաջ դրված է առաջադրանք հնարավորինս շուտ ստանալ նոր մանդատ, ուստի և Ալիևը նախաստորագրեց մի թուղթ, իսկ Նիկոլին տվեցին թուղթ ու ասացին՝ գնա ընտրության, բեր մեզ փոփոխված սահմանադրական հանրաքվե՝ Անկախության հռչակագիրը միջից հանված։ Նիկոլ Փաշինյանը որ պահին հասկանա, որ իր խաղաղության կուտը հնարավորիս շատ ականջներ է լցվել ու գնալու են «Թաջ» ֆիրմայի չստիկ ենք հագնելու էժան գնով, ինքն արագ կգնա այն օրակարգին, որն իր ուսերին դրված է այն ուժերի կողմից, որոնք այլևս իր փոխարեն գրում են իր ու ՀՀ-ի ճանապարհային քարտեզը»։
Տաթև ՀԱՐՈՒԹՅՈՒՆՅԱՆ
Հ. Գ. Լուսանկարը ֆեյսբուքյան էջում հրապարակել է լրագրող Դավիթ Սարգսյանը՝ մակագրելով. «Փաշինյանի՝ վարչապետ դառնալուց մեկ օր առաջ՝ 2018 թ․-ի մայիսի 7-ին, Հայաստանում ԵՄ պատվիրակության ղեկավար, դեսպան Պյոտր Սվիտալսկին իր ոտքով գնում է Անդրիաս Ղուկասյանի խափանման միջոցի հարցով դատական նիստին։ Աննախադեպ բան էր, որ ՀՀ-ում հավատարմագրված որևէ դեսպան անձամբ մասնակցեր դատական նիստի։ Անդրիաս Ղուկասյանը նույն օրը դատարանի դահլիճից ազատ է արձակվում։
Սա հիշեցի՝ Լիդյայի, Սրբազանների, անչափահաս արցախցիների և տասնյակ այլ՝ նախկին ու ներկա քաղբանտարկյալների սարքովի դատավարությունների ֆոնին։ «Եվրոպական արժեքների նվիրյալ» որևէ մեկի ծպտունն անգամ դուրս չի եկել աղաղակող խախտումների դեմ»:
