Գագիկ Ծառուկյանի եւ նրա հետ փոխկապակցված անձանց՝ ապօրինի ծագում ունեցող գույքի բռնագանձման պահանջի մասին նախորդ դատական նիստում պաշտպանական կողմը արագացված դատաքննության անցնելու միջնորդություն էր ներկայացրել:
Փաստաբան Հարություն Հարությունյանը Aravot.am-ի հետ զրույցում ասաց, որ այդ միջնորդությունը ներկայացնելիս հաշվի են առել, որ Գագիկ Ծառուկյանը 2003 թվականից է պաշտոնատար անձ հանդիսացել, իսկ Սահմանադրական դատարանի որոշման համատեքստում այն գույքը, որը ձեռք է բերվել մինչեւ պաշտոն ստանձնելու պահը, տվյալ պարագայում մինչեւ 2003 թվականի հունիսի 12-ը, բռնագանձման ենթակա զանգվածի մեջ չի կարող մտնել:
«Դատախազությունը ժամանակ էր պահանջել, որպեսզի դիրքորոշում ներկայացնի: Այսօր, ըստ էության, մասնակիորեն առարկեց: Այն գույքերի մասով, որոնք թեեւ նախկինում են ձեռք բերվել, բայց հետագայում ներդրումներ են արվել կամ ավելացումներ են կատարվել կամ միավորվել են այլ գույքի հետ պաշտոնի ստանձնումից հետո, առարկեց, մյուս մասով՝ չառարկեց:
Կարդացեք նաև
Միեւնույն ժամանակ մենք այսօր հայցի ապահովումը մասնակիորեն վերացնելու միջնորդություն ներկայացրինք, որ պարոն Ծառուկյանը իր ՍՊԸ-ներից մեկի մեջ ներդնի իրեն պատկանող մեկ այլ գույք»,-ասաց փաստաբանը:
Հայցվորը ողջամիտ կարճ ժամանակ խնդրեց նյութերը ուսումնասիրելու եւ դիրքորոշում արտահայտելու համար:
Նախագահող դատավոր Լիլի Դրմեյանը միջնորդության քննարկման համար նիստ նշանակեց օգոստոսի 28-ին, ժամը 16:00-ին: Իսկ գործի քննության վերաբերյալ կողմերը կծանուցվեն՝ կախված արդեն դատական ակտից:
Աշոտ ՀԱԿՈԲՅԱՆ
