Փառատոներն ինչպես աշխարհում, այնպես էլ մեզանում, աչքի են ընկնում իրենց ինքնատիպությամբ: Եվ ահա մի փառատոնի, այն էլ միջազգային, սկիզբ է դնում Երևանի օպերային թատրոնը: Վերջինիս ֆեյսբուքյան էջից օրերս տեղեկացանք (մեջբերում ենք առանց միջամտության)
Սիրելի՛ հանդիսատես,
Օպերային թատրոնը մեկնարկում է իր 93-րդ թատերաշրջանը «ԱՐԵՆԱ ԼՈՌԻ» արվեստի միջազգային փառատոնի շրջանակում
Այս տարի Օպերային թատրոնի նոր թատերաշրջանի բացումը տեղի է ունենալու Ստեփանավանում
Կարդացեք նաև
Օգոստոսի 28 19։30
Արամ Խաչատրյան «Դիմակահանդես» բալետ
Օգոստոսի 29 19։30
Արմեն Տիգրանյան «Անուշ» օպերա
Հանդիպում ենք Ստեփանավանում՝ Սոս Սարգսյանի անվան մշակույթի պալատի բակում
Ի դեպ այս մասին իր ֆեյսբուքյան էջում հայտարարել է նաև ՀՀ ԿԳՄՍ նախարարը:
Aravot.am-ը կապվեց Ստեփանավանի համայնքապետարանի աշխատակազմի քարտուղար Հասմիկ Մովսիսյանի և աշխատակազմի կրթության, մշակույթի, սպորտի, առողջապահության, սոցիալական աջակցության և տուրիզմի բաժնի պետ Գայանե Ղալաչյանի հետ, որոնք մեզ հետ զրույցում փոխանցեցին հետևյալը:
Հասմիկ Մովսիսյան. «Ստեփանավան համայնքում մեկնարկում է մշակութային մի իրադարձություն, որն իր բացառիկ և աննախադեպ բնույթով մեծ ոգևորություն է առաջացրել քաղաքի բնակչության շրջանում։
ՀՀ Օպերայի և բալետի ազգային ակադեմիական թատրոնի 93-րդ թատերաշրջանի մեկնարկը հենց Ստեփանավանից ազդարարելը մեծ պատիվ է և միաժամանակ հզոր մշակութային շունչ համայնքի համար։
Ստեփանավանը մշտապես աչքի է ընկել իր հարուստ մշակութային անցյալով և արվեստասեր հասարակությամբ։ Եվ ահա, երկար սպասումից հետո, մեր քաղաքը վերածվում է բեմի՝ պատրաստ ընդունելու բարձր արվեստը։
Օգոստոսի 28-ին և 29-ին Ստեփանավանի հանդիսատեսն ու հյուրերը հնարավորություն կունենան վայելելու Արամ Խաչատրյանի «Դիմակահանդես» բալետը և Արմեն Տիգրանյանի «Անուշ» օպերան։ Այս ներկայացումներով համայնքում մեկնարկում է մշակութային նոր ալիք։
Այս իրադարձությունը իրականացվում է համայնքի ղեկավար Արմեն Գրիգորյանի, ԱԺ պատգամավոր Արփի Դավոյանի և Օպերայի և բալետի ազգային թատրոնի տնօրեն Կարեն Դուրգարյանի միջև ծավալված նախաձեռնող և արդյունավետ համագործակցության արդյունքում։ Եռակողմ այս համագործակցությունը հզոր թափ կհաղորդի Ստեփանավանում նոր և լուավոր մշակութային էջի մեկնարկին:
Մարզերում մշակութային նման ծրագրերն ունեն բացառիկ նշանակություն՝ հոգևոր վերածննդի, ազգային ինքնության ամրապնդման և համայնքային համախմբման տեսանկյունից։ Որպես համայնքի քաղաքացի՝ խորապես երախտապարտ եմ բոլոր նրանց, ովքեր իրենց նվիրումով և ջանքերով հնարավոր դարձրին մեր քաղաքի մշակութային կյանքի վերածնունդը։
Սա պատրանք չէ։ Սա իրականություն է, որը մեր աչքի առաջ դառնում է պատմություն»:
Գայանե Ղալաչյան. «Օպերային թատրոնի նոր՝ 93-րդ թատերաշրջանի մեկնարկն այս տարի տրվելու է Ստեփանավան քաղաքում, ինչը մեծ իրադարձություն է մեր տարածաշրջանի համար՝ Արամ Խաչատրյանի «Դիմակահանդես» բալետ, Արմեն Տիգրանյանի «Անուշ» օպերա, այն էլ՝ բաց երկնքի տակ: Հազարավոր մարդիկ անհամբերությամբ և մեծ ոգևորությամբ են սպասում ակնդրելու և ունկնդրելու այս մշակութային գլուխգործոցները: Ինչ խոսք, այս միջոցառումները յուրովի կաշխուժացնեն մեր քաղաքի մշակութային կյանքը, և համոզված եմ, որ ոչ միայն մեր քաղաքից, այլ հանրապետության այլ քաղաքներից շատ հանդիսատես կունենանք»:
Հավելենք, որ Օպերային թատրոնը՝ իր տանը, 93-րդ թատերաշրջանի առաջին ներկայացմամբ՝ Տիգրանյանի «Անուշ», հանդես կգա սեպտեմբերի 4-ին:
Սամվել ԴԱՆԻԵԼՅԱՆ
