Ադրբեջանի նախագահ Իլհամ Ալիևը շնորհավորական նամակ է հղել Ուկրաինայի նախագահ Վոլոդիմիր Զելենսկիին՝ Ուկրաինայի Պետական տոնի՝ Անկախության օրվա տոնի կապակցությամբ։
«Օգոստոսի 24-ի՝ Անկախության օրվա առթիվ անձամբ իմ և Ադրբեջանի ժողովրդի անունից Ձեզ և Ձեր միջոցով՝ ողջ ուկրաինական ժողովրդին, հղում եմ ամենաանկեղծ շնորհավորանքներս ու լավագույն մաղթանքները։
Ադրբեջանա-ուկրաինական միջպետական հարաբերությունները բխում են այն մեծ համակրանքից, որ մեր ժողովուրդները տածում են միմյանց նկատմամբ, ինչպես նաև պատմականորեն ձևավորված բարեկամության ու փոխադարձ հարգանքի ավանդույթներից», — նշված է Ադրբեջանի նախագահի ուղերձում։
«Այս ամուր հիմքի վրա կառուցված հարաբերությունները ներկայումս զարգանում և հարստանում են նոր բովանդակությամբ։ Քաղաքական երկխոսությունը, համագործակցությունը տնտեսության, տրանսպորտի, էներգետիկայի և հումանիտար ոլորտներում հանդիսանում են մեր երկկողմ հարաբերությունների բնութագրող հիմնական գործոններից։
Կարդացեք նաև
Գովելի է, որ մեր երկրները ցուցաբերում են փոխադարձ աջակցություն և համերաշխություն տարածքային ամբողջականության և ինքնիշխանության հարցերում՝ համաձայն միջազգային իրավունքի նորմերի և սկզբունքների։ Ադրբեջանը շարունակելու է բարեկամ ուկրաինական ժողովրդին ցուցաբերել անհրաժեշտ մարդասիրական աջակցություն և օգնություն։
Համոզված եմ, որ մենք շարունակելու ենք համատեղ ջանքեր գործադրել ադրբեջանա-ուկրաինական բարեկամության և փոխշահավետ համագործակցության հետագա ամրապնդման ու խորացման ուղղությամբ՝ մեր ժողովուրդների կամքին համապատասխան», – ընդգծել է Ալիևը։
«Այս տոնական օրը մաղթում եմ Ձեզ քաջառողջություն, երջանկություն և հաջողություններ Ձեր գործերում, իսկ բարեկամ ուկրաինական ժողովրդին՝ խաղաղություն և հանգստություն»,- եզրափակել է Ադրբեջանի նախագահը։
