Իրանի նախագահ Մասուդ Փեզեշքիանը ՌԴ նախագահ Վլադիմիր Պուտինի հետ զրույցում գոհունակություն է հայտնել Ալյասկայում կայացած բանակցությունների արդյունքների կապակցությամբ՝ հույս հայտնելով, որ դրանք կնպաստեն Ուկրաինայում ճգնաժամի շուտափույթ լուծմանը։ Այս մասին հայտնում է ԻԻՀ նախագահի մամուլի ծառայությունը, նշելով, որ ԻԻՀ նախագահը վերահաստատել է Իրանի դիրքորոշումը միջուկային զենքի առնչությամբ:
Պուտինի հետ զրույցում Փեզեշքիանը խոստացել է անձամբ վերահսկել Ռեշտ-Աստարա երկաթուղու արագացված շինարարությունը. այն «առանցքային դեր է խաղում» Պարսից ծոցի՝ Ռուսաստանի և Կենտրոնական Ասիայի հետ «Հյուսիս-Հարավ» միջազգային տրանսպորտային միջանցքի (ՄՏՄ) և Իրանի ու Ռուսաստանի միջև այլ երկկողմ համաձայնագրերի միջոցով կապն ապահովելու գործում։
Իրանի նախագահը կարևորել է նաև տարածաշրջանային և միջազգային կազմակերպությունների՝ Եվրասիական տնտեսական միության (ԵԱՏՄ), Շանհայի համագործակցության կազմակերպության (ՇՀԿ) և ԲՐԻԿՍ-ի դերը՝ որպես անդամ պետությունների՝ մասնավորապես Ռուսաստանի և Չինաստանի հետ միակողմանի գործողություններին հակազդելու համար համագործակցությունն ամրապնդելու հարթակների։
Պուտինի հետ զրույցում Փեզեշքիանը հիշատակել է նաև Հայաստան կատարած իր վերջին այցը, որի ընթացքում՝ նրա խոսքով՝ ՀՀ վարչապետ Նիկոլ Փաշինյանը վստահեցրել է իրեն, թե Իրանի մտահոգությունները լիովին հաշվի են առնվել Ադրբեջանի և ԱՄՆ-ի հետ քննարկումներում և համաձայնագրերում։
Կարդացեք նաև
ԻԻՀ նախագահը կողմ է արտահայտվել Իրանի և Ռուսաստանի մասնակցությամբ «3+3» երկխոսության ձևաչափին, որպես կովկասյան տարածաշրջանում խնդիրների լուծման ավելի արդյունավետ մեխանիզմի։
Ի պատասխան՝ նախագահ Պուտինը ներկայացրել է ԱՄՆ նախագահ Դոնալդ Թրամփի հետ Ալյասկայում վերջերս կայացած բանակցությունների հիմնական կետերը՝ նշելով, որ կան դրական արդյունքներ, որոնք կարող են հանգեցնել Ուկրաինայում շարունակվող հակամարտության կարգավորմանը։
Պուտինը Մոսկվայի և Թեհրանի միջև հարաբերությունները կառուցողական և կայուն կերպով բարելավվող է բնութագրել՝ նշելով այս տարվա առաջին կիսամյակում երկու երկրների միջև ապրանքաշրջանառության 11% աճը։
Նա նաև նշել է համատեղ նախագծերի առաջընթացի մասին, ներառյալ Ռեշտ-Աստարա երկաթուղու զգալի շինարարությունը և Բուշեր ԱԷԿ-ի հետ համագործակցության գոհացուցիչ առաջընթացը՝ հավելելով, որ ներկայում այդ էլեկտրակայանի համար նոր վառելիքի մատակարարումն ընթացքի մեջ է։
ՌԴ նախագահը հաստատել է, որ Ռուսաստանը վճռականորեն աջակցում է ուրան հարստացնելու Իրանի իրավունքին՝ դա անվանելով իրենց գործընկերության հիմնական և էական կողմ և հույս հայտնել, որ ՄԱԿ-ի 2231 բանաձևի շուրջ բանակցությունները կհանգեն բարենպաստ ավարտի։
