«Այստեղ դատավորի վարքագիծ չկա, որովհետեւ այն, ինչ անում է դատավորը, իրավաբանության հետո որեւէ աղերս չունի։ Ինքը խորապես գիտի, որ ինքն ապօրինություն է անում, բայց անզոր է մարդը, ի վիճակի չէ։ Դրա համար դատավոր պիտի լինի այն անձը, ով ի զորու է հաղթահարելու այդ ճնշումները եւ անձի ճակատագրի հետ կապված որոշում կայացնի»,- Երեւանի առաջին ատյանի ընդհանուր իրավասության քրեական դատարանի Ավան նստավայրում Հայաստանյայց առաքելական սուրբ եկեղեցու Շիրակի թեմի առաջնորդ Միքայել արքեպիսկոպոս Աջապահյանի գործով դատական նիստից հետո լրագրողներին ասաց Միքայել սրբազանի պաշտպան Երեմ Սարգսյանը։ Նա նշեց, որ սա խայտառակ վիճակ է։
«Այսինքն՝ եթե ինքն ի զորու չէ այս ընթացիկ իրավիճակում օբյեկտիվ որոշում կայացնել, մենք իրենից ակնկալենք, որ վերջնական արդյունքում անմեղությո՞ւն է հաստատելու։ Պարզ ասեմ, բացարձակապես չեմ ակնկալում, ինքն այն անձնավորությունը չէ, որն ի զորու է անկախ, անաչառ դատական ակտ կայացնելու։
Հետեւաբար, ցավոք սրտի, արդեն ցույց է տալիս, որ ինքը մեղադրական վերդիկտ է կայացնելու՝ անկախ պրոցեսների բովանդակությունից եւ երեւույթներից։ Բայց ոչինչ, դա էլ է անցողիկ, ի վերջո Միքայել սրբազանը վստահեցնում է, որ ինքն արդարանալու է, մենք դրան կհասնենք։ Բայց դատավորի գործողություններն արդեն իսկ հատում են հանցավորի շեմը, ինքն ակնհայտ անարդար դատական ակտեր է կայացնում»,- հավելեց փաստաբանը։
Մանրամասները՝ տեսանյութում
Կարդացեք նաև
Միքայել սրբազանի պաշտպան Մարինե Ֆարմանյանն էլ ասաց, որ գործընթացները խառնվել են, տպավորություն է, որ հանրային մեղադրողները եւ դատավորը պաշտպանվում են Միքայել սրբազանի պաշտպանների ասածներից։
Մինչդեռ, իրենք իրենց սահմանադրական գործառույթները պիտի կատարեն։ «Նախ՝ մեղադրանքը պիտի օրենքի շրջանակներում բերվեր դատարան, սա ապօրինի գործընթաց է, եւ առհասարակ արդարադատության իրականացման շրջանակի մեջ մենք տեսնում ենք, որ չկա արդարություն եւ արդարադատություն։
Դատավոր Արմինե Մելիքսեթյանն արդար դատարան չէ, պատշաճ դատարան չէ, եւ այսօրվա նիստը մեզ այլեւս ի գիտություն, նրանից արդարադատություն պահանջելն այլեւս իրատեսական չէ։ Այսօր նրա կողմից կայացված խիստ ապօրինի որոշումները միայն մի բանի մասին կարող են վկայել, որ կամ մեղադրական վերդիկտն արդեն ստորագրել, եկել էր, կամ հիմա գնաց ստորագրելու։ Բայց դա մեզ չի կանգնեցնում, մեր պայքարն արդարադատության համար է։ Այո, ինչպես պարոն Սարգսյանն ասաց, Միքայել սրբազանն արդարացվելու է։ Երբ կլինի, ինչ եղանակով կլինի, ներպետական, թե միջազգային գործիքակազմի օգտագործմամբ, դա մի օր տեղի է ունենալու։ Իսկ այսօրվա պատասխանատուները բոլորն օրենքի առաջ են կանգնելու»,- նշեց նա։
Մանրամասները՝ տեսանյութում
Նշենք, որ ըստ հրապարակված մեղադրական եզրակացության՝ Միքայել սրբազանին մեղադրանք է առաջադրվել այն բանի համար, որ նա, «ունենալով արքեպիսկոպոսի հոգեւոր աստիճան եւ հանդիսանալով Հայ Առաքելական Սուրբ Եկեղեցու Շիրակի թեմի առաջնորդը, պարբերաբար հրապարակային ելույթներով հանդես գալով զանգվածային լրատվության միջոցներով, ունենալով մեծ թվով հետեւորդներ եւ հետեւաբար նաեւ՝ իր խոսքով հասարակության անդամների վարքագիծն ուղղորդելու զգալի հնարավորություն, համաձայն չլինելով ներքին եւ արտաքին քաղաքականության հետ կապված հարցերի վերաբերյալ ՀՀ կառավարության դիրքորոշումների հետ, օգտագործելով զանգվածային լրատվության միջոցները, տեղեկատվական ու հաղորդակցական տեխնոլոգիաները, նախ՝ 2024 թվականի փետրվարի 3-ին, ապա նաեւ՝ 2025 թվականի հունիսի 21-ին, զանգվածային լրատվության միջոցների ներկայացուցիչներին տրված հարցազրույցների ընթացքում հնչեցրել է իշխանությունը զավթելուն ուղղված հրապարակային կոչեր»։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
