2025 թվականի հուլիսին «Հանրապետություն» կուսակցության առաջնորդ Արամ Սարգսյանի սպանությունը նախապատրաստելու մեղադրանքով կալանավորված Ստեփան Սամվելյանի գործով դատական նիստն այսօր հետաձգվեց:
Հանրային մեղադրողը դատարանից ժամանակ խնդրեց ծանոթանալու պաշտպանական կողմի ներկայացրած բժշկական փաստաթղթերին: Պաշտպանական կողմը միջնորդություն էր տարել դատարան Սամվելյանի խափանման միջոցի փոփոխության վերաբերյալ՝ ներկայացնելով համապատասխան բժշկական փաստաթղթերը:
Սամվելյանի պաշտպան Զարուհի Փոստանջյանը մեզ հետ զրույցում պատմեց, որ այսօր դատական նիստին էր ներկայացել նաեւ տուժող Արամ Սարգսյանը, որը նախաքննության ընթացքում նույնիսկ առերեսման չէր եկել. «Այն ժամանակ տակտիկան եւ մտածածը ուրիշ էր, հիմա փոխվել է: Հասկացան՝ մեղադրանքը փլվում է: Եթե դու իրապես տուժող ես, բա ինչո՞ւ ես հրաժարվել ծանոթանալ գործի նյութերին: Ինքը գործի նյութերին էլ չի ծանոթացել: Այսինքն ՝ նյութ էլ չկա, որ ծանոթանա, հետո ասել են՝ պատվերը շատ է երեւում, գնա դատարան, որ գոնե պատվերը չերեւա, եկել էր այսօր»:
Սամվելյանը չի ընդունում առաջադրված մեղադրանքը, ըստ Փոստանջյանի՝ չկան մեղքը հաստատող ապացույցներ. «Կա Սամվելյանի եւ նրա գործընկերոջ հեռախոսազրույց, որտեղ վերացական բնույթի խոսքեր են եւ այդ վերացական խոսակցությունը քննիչն իր ձեւով մեկնաբանել է: Գնում եմ այստեղ, գնում եմ այնտեղ, պետք է գրասենյակը ռեմոնտ անեմ, այդ ռեմոնտ բառը մեկնաբանել է որպես սպանության նախապատրաստում»:
Կարդացեք նաև
Ըստ մեր զրուցակցի՝ քրեական հետապնդման հիմք է եղել Արարատ մարզի ԱԱԾ մի աշխատակցի զեկուցագիրը։ վերջինս հայտնել է, որ ունի տվյալներ, որ նախապատրաստվում է հանցագործություն. «Բայց այդ ի՞նչ տվյալներ են, ո՞վ իրեն փոխանցեց անհայտ է։
Ակնհայտ է, որ կեղծիքի հիման վրա է գործը կազմվել: Այդ զեկուցագրի հիման վրա որոշում է կայացվել սկսել օպերատիվ հետախուզական միջոցառումներ, և սկսվել են գաղտնալսումներ։ Սա նշանակում է՝ բոլորի վրա կարող են նույնն անել, բոլորս ինչ խոսում ենք, ամեն մեկիս խոսքից ծաղկաքաղ անեն, մեկնաբանեն, ասեն՝ դու ցանկացել էիր էս մարդուն սպանել»:
Ըստ Փոստանջյանի` իր պաշտպանյալին մեղադրանք առաջադրելիս նախաքննական մարմինը սկզբում ցանկացել է սպանության նախապատրաստում դիտարկել նաեւ «Հանրապետություն» կուսակցությունից նաեւ Արտակ Զեյնալյանի նկատմամբ, հետո փոշմանել են. «Հետո տեսել են՝ վերջինիս հետ կապված ընդհանրապես ոչ մի բան չի կպնում, որովհետեւ նրա հետ կապված ոչ մի բան չկա, միայն Արամ Սարգսյանի նկատմամբ սպանության նախապատրաստումն են մեղսագրել» Արամ Սարգսյանի ու Ստեփան Սամվելյանի իրավական վեճը գալիս է դեռ 2000-ականների սկզբից: Վերջիններս համատեղ ձեռնարկատիրական գործունեությամբ են զբաղվել, Մեղրու ոսկու գործարանն են ստեղծել, ունեցել են բաժնեմասեր:
Ըստ Փոստանջյանի՝ Արմեն Սարգսյանը հետագայում խաբել է Սամվելյանին, գործարանը վաճառել եւ նրա ունեցած բաժնեմասի վաճառքի գումարը չեի տվել: Մեր զրուցակիցը նաեւ հայտնեց, որ իր պաշտպանյալն այնպիսի առողջական խնդիրներ ունի, ինչի հետեւանքով առաջացել է հաշմանդամություն, հենաշարժողական խնդիրներ եւ այն արարքները, որոնք մեղսագրվում են նրան, ուղղակի անհամատեղելի ու անիրականանալի են դառնում Սամվելյանի ունեցած առողջական խնդիրների հետ. «Իր խոցելի վիճակը փորձեցին օտագործել: Իրենց արարքները, վեճի առարկան թաքցնեն համ էլ պատժեն խոսքի ազատության համար, ինքը շատ է քննադատել, ելույթներ է ունեցել : Իր վիճակն այնքան է վատացել, որ պետք է անցնի դիալիզի, այդ ցուցումը գրել են, իսկ դատապարտյալների հիվանդանոցում դա անցնել հնարավոր չէ»:
Երեւանի ավագանու անդամ, «Հանրապետություն» կուսակցությունից Անի Խաչատյանն այսօր անդրադարձել էր դատական նիստին ու գրառում արել սոցցանցերում. «Այսօր Երևանի ընդհանուր իրավասության առաջին ատյանի քրեական դատարանի Շենգավիթ նստավայրում քննարկվում էր Արամ Սարգսյանի սպանության նախապատրաստման մեջ մեղադրվող անձի խափանման միջոցը՝ կալանքը փոխելու հարցը։
Եվ պատկերացրեք, անձնական երաշխավորությամբ հանդես գալու համար դատարան էին ժամանել դաշնակցական պատգամավորներ Գառնիկ Դանիելյանն ու Քրիստինե Վարդանյանը, ինչպես նաև ՀՀԿ պատգամավոր Տիգրան Աբրահամյանը (անկեղծ ասած՝ այստեղ իսկապես զարմացա․ ՀՀԿ-ն ու «ռոբադաշնակները» իմ պատկերացմամբ գոնե նման թեմաներում այլ ճամբարում էին երևում…»:
Արփինե ՍԻՄՈՆՅԱՆ
