«Հանուն Հանրապետության» կուսակցության նախագահ Արման Բաբաջանյանի ֆեյսբուքյան գրառումը
Առաջիկայում Հայաստան է ժամանելու ԱՄՆ կառավարության պատվիրակությունը՝ գործնականացնելու օգոստոսի 8-ի Վաշինգտոնում ձեռք բերված պայմանավորվածությունները։ Այցի ընթացքում Սյունիքում կիրականացվեն նախնական ուսումնասիրություններ և գնահատումներ, որոնք պետք է ձևավորեն ենթակառուցվածքային ծրագրերի իրագործման հստակ ճանապարհային քարտեզ։
Միաժամանակ կսկսվեն իրավական քննարկումներ՝ ուղղված Հայ-ամերիկյան կոնսորցիումի ստեղծմանը։ Թեև այս փուլում դեռևս հստակ չէ ամերիկյան կողմից դրա պետական թե մասնավոր բնույթը, սակայն ակնհայտ է, որ խոսքը վերաբերում է այնպիսի ինստիտուցիոնալ կառույցի ձևավորմանը, որը պետք է դառնա երկարաժամկետ համագործակցության ամուր հիմք և մեծածավալ տնտեսական գործակցության սկիզբ։
Հայաստանի առջև դրված է մեծածավալ և բազմաշերտ գործառույթների իրականացում՝ իրավական և կառավարչական լուծումներից մինչև տեխնիկական ու ֆինանսական կազմակերպում։ Այս գործընթացի հաջողությունը կախված է ոչ միայն կառավարության հետևողականությունից և պրոֆեսիոնալիզմից, այլև հանրային վերահսկողությունից։ Հասարակության ու քաղաքացիական կառույցների պարտքն է լինել պահանջատեր՝ ապահովելու թափանցիկություն և հաշվետվողականություն։
Կարդացեք նաև
Միայն այս պայմաններում է հնարավոր երաշխավորել, որ սկսվող գործընթացը կծառայի բացառապես Հայաստանի պետական շահերին և կդառնա մեր ժողովրդի ապագան կերտող հուսադրող ուղի։