«Կոլեկտիվ հայցով միգուցե դիմենք տեսչական մարմին, բայց կոլեկտիվ հայցով դատարան դիմել աշխատանքից ազատումների հետ կապված, նման գործառույթ չկա։ Կփորձենք դիմել, որ հասկանանք՝ աշխատանքի տեսչությունն ինչ է անում»,- մամուլի ասուլիսի ժամանակ տեղեկացրեց «Հայաստանի էլեկտրական ցանցեր» ՓԲԸ գլխավոր տնօրենի նախկին պաշտոնակատար Դավիթ Ղազինյանը՝ անդրադառնալով ՀԷՑ-ի աշխատակիցների ազատումներին։
Դավիթ Ղազինյանը նշեց, որ ՀԷՑ-ի կառավարիչը սանձարձակ է գործում․ նրա գործունեությունը պետք է կասեցվի։ Որպես օրինակ ասաց․ «ՀԷՑ-ը յուրաքանչյուր տարի և անընդհատ ունի պարտավորություններ։ Հաշվիչները մեր բոլոր բաժանորդների կարող են ապամոնտաժվել և գնալ ստանդարտացման ինստիտուտ։ Դա կարող է լինել վատ աշխատանքի, կամ բաժանորդների նախաձեռնությամբ։ Երբ դրվում են հաշվիչները, պետստանդարտը տալիս է ութ տարվա ժամկետ։ Մենք այս տարի միայն 80 հազար հաշվիչ ունեինք, որ 2026-ի հունվարին ժամկետանց պետք է դառնային։ Նախաձեռնել էինք հաշվիչների փոփոխություն, որը լայն ծավալով գնում էր։ Իրենց կարելի է, չէ՞ դա չանել, մեր՝ չանելու պարագայում երևի կախեին։ Իմ տեղեկություններով՝ այդ գործընթացը չի գնում․ տենդերը չեղարկելը ևս վերաբերում է դրան։ Ավելին, պետստանդարտը պարտավորություն ուներ մեր տված յուրաքանչյուր հաշվիչ ստուգելու»։
Դավիթ Ղազինյանը նաև նշեց․ «Ոչ մեկը չի խոսում նրա մասին, որ Սամվել Կարապետյանն առաջին անգամ 2024-ին է շահաբաժին ստացել։ Ութ տարի որևէ դրամ չի վերցրել իր շահույթից։ Այս պահին Սամվել Կարապետյանը 70 միլիարդ դրամ շահաբաժին ունի ստանալու։ Ի՞նչն էր խանգարում նրան իր շահույթը վերցնել։ Ընդամենը ՀԷՑ-ը սնանկանալու էր»։
Կարդացեք նաև
Դավիթ Ղազինյանն ասաց, որ իր գրպանից Սամվել Կարապետյանը մինչև այժմ ամսական 150 միլիոն դրամի կարգի գումար է տալիս ՀԷՑ-ին ու պարզաբանեց․ «ՀԷՑ-ի համար ՀԾԿՀ-ի սահմանած աշխատավարձի ֆոնդից 2015-ից մինչև այսօր ՀԷՑ սեփականատեր Սամվել Կարապետյանը տրամադրել է ավել գումար՝ 11,6 միլիարդ դրամ։ Մոտավորապես ամիսը 150 միլիոն դրամի կարգի։ Եթե ընդունենք, որ ամիսը 150 միլիոն դրամ սեփականատերը դեռևս տալիս է, իրենք 20 միլիոն կրճատել են և դա ներկայացնում են որպես բարեգործություն, որ 1000 աշխատողներ, որոնք մինչև 200 հազար դրամ աշխատավարձ են ստանում, տասը տոկոս ավելի են ստանալու։ Արդյոք ավելի բարոյական չէր լինի՞ ասել, որ սա սեփականատիրոջ միջոցներն են, այլ ոչ թե աշխատավարձային ֆոնդի միջոցները։
Սեփականատերն ունի իրավունք իր սեփական միջոցներն այլևս չուղղել, որոշել, որ ես այլևս չեմ ուզում տրամադրել ամսական 150 միլիոնը․ տեղավորվեք աշխատավարձային ֆոնդի մեջ։ Սամվել Կարապետյանը չի անում այդ քայլը այս բոլոր անարդար մեթոդներից հետո, մի քանի պատճառներով՝ նախ որպես պետականամետ մարդ, նա դրանով չի պատժում կառավարչին, իշխանությանը կամ հանձնաժողովին, երկրորդ՝ իր գրպանից տված գումարները կրճատելու դեպքում միանշանակ կրճատումներ պետք է արվեն, որ հանձնաժողովի տված ֆոնդի մեջ տեղավորվեն։ Հաշվի առնելով, որ այդ աշխատավարձերը չեն կրճատվելու իրենց բերած մարդկանցից, հիմնականում կրճատվելու են պրոֆեսիոնալ թիմից, ինչն այսօր արվում է, նա չի գնում այդ քայլին։
Երրորդ՝ ամենակարևոր հանգամանքներից մեկն այն է, որ այդ պարագայում ՀԷՑ-ն ընդհանրապես կործանման է գնալու։ Հիմա բերել 20 հազար դրամը 2 միլիոնի տեղ վաճառել այդ պաթոսը, որով ասվեց, համարում եմ չափազանցված»։
Դավիթ Ղազինյանը մտահոգություն հայտնեց՝ պետությունն իրենց ձեռքին է․ էնպիսի նյութերով են եկել, որոնք հասու են միայն հատուկ ծառայություններին․ «Զինված եկել են ու ճնշումներ են գործում»։
Տաթև ՀԱՐՈՒԹՅՈՒՆՅԱՆ
