«Իմ կարծիքով՝ իմիտացիա են ստեղծում միջազգային հանրության առաջ, որ տեսեք՝ մենք ձեր որոշումը տվեցինք հանձնաժողովին՝ մեր պարզաբանմամբ։ Անգամ չեմ զարմանա, եթե մի օր պարզվի, որ իրենք են ստիպել հանձնաժողովի նախագահին պարզաբանում ուզել։ Ասել են հանձնաժողովի նախագահին՝ դու գրի, պարզաբանում ուզի, մենք քեզ տանք, մենք ամբողջությամբ մաքրվենք, մնա քո վրա։ Մեսրոպյան Մեսրոպն ինչի՞ է այդ բեռն իր վրա վերցրել, խնդրում եմ իրենից հարցրեք»,- մամուլի ասուլիսի ժամանակ հայտարարեց «Հայաստանի էլեկտրական ցանցեր» ՓԲԸ գլխավոր տնօրենի նախկին պաշտոնակատար Դավիթ Ղազինյանը։
Նա հայտնեց, որ ՀԷՑ ՓԲԸ տնօրենների խորհրդի նախագահ Նարեկ Կարապետյանը գրություն է ուղարկել Հանրային ծառայությունները կարգավորող հանձնաժողովի (ՀԾԿՀ) նախագահ Մեսրոպ Մեսրոպյանին, որ կատարվի Ստոկհոլմի արբիտրաժի միջանկյալ որոշումը. «Մի պատասխանում հանձնաժողովի նախագահը նշել է, որ դա իր իրավասությունների մեջ չէ, բայց հետո մեզ հայտնի դարձավ, որ հանձնաժողովի նախագահը գրություն է ուղարկել կառավարության աշխատակազմի ղեկավարին։ Նա խնդրել է կառավարության դիրքորոշումը Ստոկհոլմի առևտրային պալատի արբիտրաժի ինստիտուտի նշանակած հրատապ որոշման ճանաչման կամ կատարման ենթակա լինելու վերաբերյալ»:
Դավիթ Ղազինյանը նշեց, թե ինչ են պատասխանել ՀՀ կառավարությունից․ «Մեխն այն է, որ կառավարության աշխատակազմի համապատասխան բաժինը՝ վարչությունն ասում է հետևյալը․ ինչ վերաբերում է արբիտրաժային վճռի կատարմանը, ապա որպես կանոն՝ արբիտրաժի վճիռը կողմերի կողմից ենթակա է անհապաղ պարտադիր կատարման։ Ինչ վերաբերում է վարույթին, նամակում ծառայության ղեկավարը նշում է, որ վարույթի կասեցումը պարտադիր չէ։ Հստակ նշվում է, որ պետք է սահմանափակվի կառավարիչ նշանակելու իրավասությունը՝ նոր օրենսդրական ակտերով։ Ստացվում է մի իրավիճակ, որ ենթադրում եմ կամ հիմնավոր կասկած ունենալու իրավունք ունենք, որ կառավարությունը իմիտացիա է ստեղծում, որ մենք կատարում ենք, մենք տվեցինք մեր կարծիքը, բայց դե, հանձնաժողովն անկախ մարմին է, ինքը պետք է որոշի։ Սա պետական գործելաոճ չէ այն առումով, որ եթե պետությունը միանում է ինչ-որ միջազգային պայմանագրի, համաձայնագրի, նշանակում է՝ ՍԴ-ի կողմից տալիս է սահմանադրականութան հարցը, համապատասխանում է, թե՝ ոչ, անցնում է ԱԺ, վավերացվում է։ Այսինքն՝ միջազգային պայմանագրերը, համաձայնագրերն ավելի վեր են, քան ներքին օրենսդրական ակտերը։
Կարդացեք նաև
Ամեն դեպքում գնդակը հանձնաժողովի նախագահի դաշտում է, և նա այդ ամբողջ տեղեկությունները ստանալուց հետո տնօրենների խորհրդի նախագահին պատասխանում է, որ մեր իրավասությունների դաշտում չէ։ Հարց է առաջանում՝ այդ դեպքում ինչո՞ւ է դիմել կառավարությանը, որ ստանա պարզաբանում։ Իմ կարծիքով՝ դիմելու հիմնական նպատակն է՝ հասկանալ ինչպես պետք է գործի։ Կառավարությունն ընդունել է՝ Ստոկհոլմի դատարանի որոշումը պարտադիր կատարման է, այսինքն՝ որոշումը կայացնելու պահից կատարման ենթակա է»։
Դավիթ Ղազինյանն ասաց՝ կառավարությունն ընդունել է, որ պարտվել է և ընդունել է, որ որոշումը ենթակա է կատարման։ Միևնույն ժամանակ նշեց․ «Ասել, որ մեր կողմից է հանդես եկել, սխալ կլինի այնքանով, որ մենք բոլորս հասկանում ենք, որ հանձնաժողովն անկախ չէ»։
Տաթև ՀԱՐՈՒԹՅՈՒՆՅԱՆ
