«Սեպտեմբերից վերսկսում ենք մեր այցերը, եւ այս անգամ ուսումնական տարին մեկնարկելու ենք Գյումրիից: Գյումրիում 2 փուլով ենք անցկացնելու մեր ինտերակտիվ դասերը՝ սեպտեմբերին եւ հոկտեմբերին: Առաջին փուլից հետո սեպտեմբերի 10-ին, 11-ին եւ 12-ին ավագ դպրոցի աշակերտների համար Գյումրիի Վարդան Աճեմյանի անվան դրամատիկական թատրոնում Հայաստանի պետական սիմֆոնիկ նվագախումբը նախագծի շահառուների համար համերգ կունենա: Նույնը նաեւ երկրորդ շրջափուլին է վերաբերվում. հոկտեմբերի վերջին էլ կունենանք համերգներ՝ եզրափակելով ծրագիրը: Նշեմ, որ Գյումրում մեզ աջակցում է Մանուկյան Սիմոն հիմնադրամը»,-Aravot.am-ի հետ զրույցում ասաց «Սիմֆոնիկ ԴասA» կրթական ծրագրի պատասխանատու Էլենիտա Սարգսյանը:
«Սիմֆոնիկ ԴասA» կրթական ծրագիրը մշակվել եւ իրականացվում է Հայաստանի պետական սիմֆոնիկ նվագախմբի կողմից՝ ԿԳՄՍ նախարարության աջակցությամբ, ծրագրի գաղափարը նվագախմբի գեղարվեստական ղեկավար եւ գլխավոր դիրիժոր Սերգեյ Սմբատյանինն է։
«Սիմֆոնիկ ԴասA»-ի հիմնական նպատակն է ձեւավորել մշակութապես կիրթ երիտասարդ սերունդ, լավ ունկնդիր, եւ այս գործընթացը նվագախումբը սկսել է դպրոցներից։
Կարդացեք նաև
«Մեր ծրագրի հիմնական առանձնահատկությունն այն է, որ փորձում ենք հանրակրթական դպրոցների աշակերտներին մոտեցնել դասական երաժշտությանը, որպեսզի իրենք սիրեն, հասկանան, որ դա հետաքրքիր է եւ արդիական, փորձում ենք փշրել այն կարծրատիպը, թե դասական երաժշտությունը քչերին է հասու, ոչ բոլորը կարող են ընկալել: Նաեւ մեր կրթական ծրագրերով, որոնք շատ են եւ նախատեսված տարբեր տարիքի երեխաների համար, փորձում ենք այնպես անել, որ դասական երաժշտությունն իրենց համար հետաքրքիր ու արդիական լինի»,-հավելում է մեր զրուցակիցը:
Մեր հարցին՝ երեխաներին հատկապես ինչն է գրավում, ինչով են իրենք ամենաշատ հետաքրքրված, «Սիմֆոնիկ ԴասA»-ի պատասխանատուն այսպես արձագանքեց. «Պարտադիր չէ, որ «Սիմֆոնիկ ԴասA»-ի մասնակից երեխաներն անպայման ունենան երաժշտական կրթություն կամ տաղանդ, ծրագիրը բոլորի համար է: Իրենց բացատրում ենք, որ դասական երաժշտություն ամեն օր լսում են, ուղղակի գուցե շատերը խորամուխ չեն եղել այդ ամենի մեջ կամ իրենց չեն ասել, որ օրինակ, իրենց սիրելի մուլտֆիլմում հենց դասական գործ է հնչում, կամ գովազդում, կամ վիդեո խաղում, որն իրենք ամբողջ օրը խաղում են: Քանի որ մեր դասերը փոքր ճամփորդություններ են՝ իրենց դասաժամերի շրջանակում, երկար չեն տեւում , որպեսզի երեխաները չհոգնեն: Մենք իրենց սովորեցնում ենք ամենատարրական բաները, որ պետք է իմանա ցանկացած կիրթ ունկնդիր, բացատրում ենք ինչ է իրենից ներկայացնում նվագախումբը, ինչից պետք է բաղկացած լինի, իրենց ուշադրությունը փորձում ենք գրավել երաժշտական գործիքների մասին հետաքրքրիր փաստերով՝ ինչ արժեն գործիքները, ինչից են պատրաստված, ինչպես է կախված հումքից՝ երաժշտությանը ձայնը փոխվում եւ այլն:
Երեխաների՝ մեզ ուղղված հարցերը հիմնականում կապված են երաժշտական գործիքների հետ: Նրանք հաճախ մոտենում են երաժիշտներին, ուզում են ձեռք տալ գործիքին, ամեն դասից հետո հարցեր են տալիս: Ու այն ամենը, ինչ պատմում ենք դասասենյակում, իրենք հետո տեսնում եւ լսում են գործնականում՝ համերգասրահում: Պատահում է, որ երաժշտական գործիքին ծանոթանալուց հետո երեխան ցանկանում է այդ գործիքով զբաղվել»:
Էլենիտա Սարգսյանը եւս մեկ անգամ ընդգծում է. «Սիմֆոնիկ ԴասA»-ի երկարաժամկետ նպատակը ոչ թե երեխաներին երաժիշտ դարձնելն է, այլ կիրթ ունկնդիր ունենալը, նաեւ իրենց գործունեությունը միտված է սիմֆոնիկ նվագախմբի ունկնդրի տարիքային շեմը երիտասարդացնելուն: «Մեր բոլոր համերգներին հանդիսատեսի 20-30 տոկոսը դպրոցահասակներն են, մենք կապը միշտ պահում ենք այն դպրոցների հետ, որտեղ այցելել ենք, սիրով հրավիրատոմսեր ենք տրամադրում: Երեխաները մեկ անգամ այցելելուց հետո ցանկանում են երկրորդ անգամ էլ գալ համերգ, հատկապես եթե ծրագրում իրենց հայտնի գործերն են ներառված լինում: Ունենք հետաքրքրված դպրոցի տնօրեններ, ուսուցիչներ, որոնք միշտ որոշակի թվով հրավիրատոմսեր են խնդրում ու անպայման այցելում են մեր համերգներին»,-ասում է մեր զրուցակիցը: Նա նշում է, որ դպրոցները հավուր պատշաճի են պատրաստվում իրենց հետ հանդիպումներին, եւ Երեւանում, եւ մարզերում ոգեւորությամբ են ընդունում, դասերի ավարտին միշտ ցանկանում են ներկայացնել իրենց տաղանդներին՝ երաժիշտ երեխաներին:
Գոհար ՀԱԿՈԲՅԱՆ
