ՀԷՑ-ի գործով որևէ մեկը որևէ տեղ Հայաստանի Հանրապետությանը չի կարող հաղթել, այդ թեման վաղուց ավարտված թեմա է: ՀԷՑ-ը պետք է ծառայի ՀՀ ժողովրդին: Չի կարող, դա բացառված սցենար է, որ որևէ սցենարով ՀԷՑ-ը շարունակի չծառայել ՀՀ ժողովրդին,- այսօր կառավարության նիստից հետո լրագրողների հետ հանդիպման ժամանակ ասաց Նիկոլ Փաշինյանը՝ պատասխանելով հարցին, թե Կառավարությունը պատրաստվո՞ւմ է իրականացնել ՀԷՑ-ի գործով ՀՀ Կառավարության դեմ նախաձեռնած արբիտրաժային դատարանի որոշումը:
-Ո՞վ է ասել, որ կառավարությունն ընդունում է, որ Ստոկհոլմի արբիտրաժային դատարանի որոշումը պարտադիր կատարելի է: Ո՞վ է հայտնել նման դիրքորոշում, ով դիրքորոշում հայտնել է, թող դիմում գրի, գնա։ Բացարձակապես նման դիրքորոշում չի կարա լինի»,- շարունակեց Փաշինյանը:
Հիշեցնենք, երեկ հրապարակվել է փաստաթուղթը, ըստ որի՝ Միջազգային իրավական հարցերով ներկայացուցչի գրասենյակ ղեկավար Լիպարիտ Դրմեյանը դիմել է ՀԾԿՀ նախագահին՝ պահանջելով կատարել Ստոկհոլմի որոշումը։ «Արբիտրաժային վճիռը կողմերի կողմից ենթակա է անհապաղ պարտադիր կատարման»,– գրել է Դրմեյանն իր պատասխանում եւ մանրամասն հիմնավորել դրույթներով։
Կարդացեք նաև
Դիտարկմանը՝ թե կառավարությունն է ընդունել, որ ՀԷՑ–ի թեմայով Ստոկհոլմի արբիտրաժը ենթակա է պարտադիր կատարման, Փաշինյանը զայրացավ. «Կառավարությունը ես եմ, չի կարող որևէ մեկն իմ դիրքորոշմանը հակասող դիրքորոշում ունենալ: Ընդհանրապես կառավարությունում եթե մարդիկ կան, որ իմ դիրքորոշմանը հակասող դիրքորոշում ունեն, հենց հիմա թող դիմում գրեն շենքերից դուրս գան, եթե՝ ոչ, ես ինքս նրանց կհանեմ»:
Արփինե ՍԻՄՈՆՅԱՆ
