Երեւանի առաջին ատյանի ընդհանուր իրավասության քրեական դատարանի Ավան նստավայրում ընթանում է Հայաստանյայց առաքելական սուրբ եկեղեցու Շիրակի թեմի առաջնորդ Միքայել արքեպիսկոպոս Աջապահյանի գործով ամփոփիչ դատական նիստը։
Միքայել սրբազանի պաշտպան Երեմ Սարգսյանը, դիմելով մեղադրող կողմին, ասաց․ «Ինչպես պնդել էի հիմնական դատալսումների ժամանակ, այդպես էլ հիմա եմ ասում՝ չբացահայտեցիք, թե այդ երկարաշունչ մեղադրանքում կոնկրետ ո՞րն էր իշխանությունը բռնի զավթելու կոչը։ Այլ կերպ ասած, առանց վկայակոչելու իշխանությունը բռնի զավթելու բուն կոչը, առանց կոչի առկայության դատարանին միջնորդեցիք, որպեսզի մեղավոր ճանաչի Հայ առաքելական եկեղեցու, հայ ազգի եւ հայոց պետականության նվիրյալ սրբազանին»։
Երեմ Սարգսյանը նաեւ հիշեցրեց, որ պաշտպանական կողմը բացարկ էր հայտնել գործով դատավոր Արմինե Մելիքսեթյանին՝ անկախ եւ անաչառ դատավոր չլինելու հիմնավորմամբ, սակայն դատավորը մերժել էր այդ միջնորդությունը։ Նա ասաց, որ դատավորը վաղուց գիտեր՝ այլ ելք չունի, քան Միքայել սրբազանին մեղավոր ճանաչելը։
«Իսկ իրականում նախագահող դատավորն ուներ եւ ունի այդ ելքը, սակայն իր վախերի պատճառով ի վիճակի չէ դա անել, նա նախընտրում է բացահայտ խախտել օրենքը, օրենքի եւ իրավաբանության հետ առնչություն չունեցող հիմնավորումներով մերժել պաշտպանության կողմի միջնորդությունները։ Դուք ձեր անօրինական վարքագծով արդեն համոզել եք, որ անկախ հանցանքի առկայությունից կամ բացակայությունից, միեւնույն է՝ մեղավոր եք ճանաչելու գերաշնորհ Միքայել արքեպիսկոպոս Աջապահյանին այդ շինծու, քաղաքական նպատակներով առաջադրված մեղադրանքում։ Մի՞թե երբեւէ չեք մտածել, թե Հայաստանի ամբողջ իրավական հանրությունը ի՞նչ կարծիք է այս ամենի մասին ունենալու, տեսնում են ձեր հստակ ապօրինությունները, ի՞նչ են մտածելու հետագայում ձեզանից արդարադատություն ակնկալող քաղաքացիները»,- նշեց Երեմ Սարգսյանը։
Կարդացեք նաև
Նա կրկնեց, որ Միքայել սրբազանի նկատմամբ քաղաքական հետապնդում է իրականացվում, քրեական հետապնդումն ապօրինի է։
Նշենք, որ ըստ հրապարակված մեղադրական եզրակացության՝ Միքայել սրբազանին մեղադրանք է առաջադրվել այն բանի համար, որ նա, «ունենալով արքեպիսկոպոսի հոգեւոր աստիճան եւ հանդիսանալով Հայ Առաքելական Սուրբ Եկեղեցու Շիրակի թեմի առաջնորդը, պարբերաբար հրապարակային ելույթներով հանդես գալով զանգվածային լրատվության միջոցներով, ունենալով մեծ թվով հետեւորդներ եւ հետեւաբար նաեւ՝ իր խոսքով հասարակության անդամների վարքագիծն ուղղորդելու զգալի հնարավորություն, համաձայն չլինելով ներքին եւ արտաքին քաղաքականության հետ կապված հարցերի վերաբերյալ ՀՀ կառավարության դիրքորոշումների հետ, օգտագործելով զանգվածային լրատվության միջոցները, տեղեկատվական ու հաղորդակցական տեխնոլոգիաները, նախ՝ 2024 թվականի փետրվարի 3-ին, ապա նաեւ՝ 2025 թվականի հունիսի 21-ին, զանգվածային լրատվության միջոցների ներկայացուցիչներին տրված հարցազրույցների ընթացքում հնչեցրել է իշխանությունը զավթելուն ուղղված հրապարակային կոչեր»։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
