Գեղարքունիքի մարզի Ճամբարակ համայնքի Ջիլի դպրոցը կառուցվել է «Տ-Քնսթրաքշն» ՓԲԸ–ի կողմից 849 միլիոն 343 հազար 166 դրամով։ Ներկայումս նույն չափի մոդուլային դպրոցների կառուցման արժեքը 1 միլիարդ 300 միլիոնից 1 միլիարդ 400 միլիոն դրամ է։ Տարբերությունը մոտ 450 միլիոն դրամ առաջացել է 2024 թվականի վարչապետի դպրոց այցի և հանրահայտ կախիչ օպերացիայի արդյունքում, այսինքն` մեկ մոդուլային դպրոցի համար հարկատուն այժմ վճարում է մեկ միլիոն դոլարով ավելի գումար։ Այս մասին հայտնել է «Տ-Քնսթրաքշն» ՓԲԸ ֆինանսական տնօրեն Լիանա Մանուկյանը՝ անդրադառնալով civic.am-ի ռեպորտաժին։
Անդրադառնալով այդ ռեպորտաժում արված պնդմանը, թե դպրոցում թերություններ են հայտնաբերվել, Մանուկյանն ասաց. «Նախ դպրոցը գտնվում է երաշխիքային սպասարկման մեջ, իսկ այդ ժամկետը նախատեսված է հենց նմանատիպ թերությունները շտկելու համար։ Թերությունները հիմնականում ոչ էական են, որոնք բնորոշ են նմանատիպ նորակառույց շինություններին։ Ինչպես տեսել եք civic.am-ի ռեպորտաժում, թերությունները կրում են կոսմետիկ բնույթ և դրանց մեծ մասն արդեն իսկ վերացվել է, մնացյալը կվերացվի առաջիկա շաբաթների ընթացքում և բոլոր այդ թերությունների վերացման համար կպահանջվի ընդամենը 3 միլիոն դրամ։
Դպրոցը կառուցվել է պետության կողմից մեզ տրամադրված նախագծի հիման վրա՝ նախագծում նշված նյութերով։ Կառույցն ամբողջությամբ համապատասխանում է նախագծին, որը մեզ շինարարության սկզբին պետության կողմից ընտրված նախագծողը տրամադրել էր թերի, կիսատ, և շինարարության ողջ ընթացքում մեր ուղարկած ազդակներից հետո նախագիծը շտկվել է, ձգձգելով շինարարական ողջ պրոցեսը և լրացուցիչ ծախսեր պատճառելով մեր ընկերությանը։
Civic.am-ի «կախիչ 2» օպերացիան գալիս է ապացուցելու Նարեկ Կարապետյանի այն թեզը, որ վարչապետի դպրոց այցելությանը գործարարները շատ կտրուկ են արձագանքել՝ թանկացնելով դպրոցների շինարարությունը մոտ մեկ միլիոն դոլարով»։
Կարդացեք նաև
Ռեպորտաժում նաեւ նշվում է, որ կան թերություններ, որոնք կարելի է մեկ-երկու օրում շտկել, կան թերություններ, որոնք բավականին լուրջ թերություններ են և այդ խնդիրներին պետք է լուծում տրվի։ Այս առնչությամբ, Լիանա Մանուկյանը նշում է. «Այսպիսով, հարց։ Ի՞նչ տարբերություն կա մեր կողմից 850 միլիոն դրամով կառուցված դպրոցի և այժմ Հայաստանի տասնյակ համայնքներում 1,3–1,4 միլիարդ դրամով կառուցվող նմանատիպ դպրոցների միջև։ Պատասխանեմ՝ ոչ մի։ Ոչինչ չի փոխվել։
Փոխվել է մեկ բան։ Երկրի ղեկավարը եկել է դպրոց և ասել, որ եթե ինչ-որ աշխատանք կատարվի ոչ պատշաճ որակի, խառնվելու են ուժայինները։ Որքան ավելանում է ճնշումը գործարարների վրա, այդքանով էլ բարձրանում են գները։ Դպրոցի շինարարության մեկ քառակուսի մետրի արժեքը 900 դոլարից դարձել է 1500 դոլար»:
Հիշեցնենք, ավելի վաղ «Տաշիր» ընկերությունների խմբի փոխնախագահ Նարեկ Կարապետյանն էլ էր տեսաուղերձով անդրադարձել այն թեմային, թե ինչպե՞ս ամեն դպրոցի շինարարությունը թանկացավ 1 մլն դոլարով. «Մինչև 2024 թվականը ամեն ինչ լավ էր ընթանում՝ պետությունը վարկեր էր ներգրավում և դպրոցներ կառուցում։ Հետո հայտնվեց մեր երկրի ղեկավարը, և 2024 թվականի սկզբին որոշեց այցելել դպրոցներ։ Տեղի ունեցավ «կախիչ» օպերացիան։ Ստուգեց դպրոցի կախիչները, խիստ նկատողություն տվեց աշխատակիցներին, քաղաքաշինության կոմիտեի նախագահին հեռացրեց աշխատանքից։ Այդ շոուից հետո մրցույթների գները մի դպրոցի հաշվարկով թանկացան մեկ միլիոն դոլարով։ Նախագծերի մեջ որևէ տարբերություն չկա, ուղղակի երկրի ղեկավարը սխալ իմպուլս է տվել՝ ասել է, եթե թերություններ լինեն աշխատանքներում, միջամտելու են ուժայինները։ Գործարարներն արձագանքելու մի ձև ունեն, նրանք վերանայում են գները։ Ինչքան պետությունը խստացնում է ճնշումը գործարարների վրա, այդքան գործարարը բարձրացնում է գները՝ իր ռիսկի հաշվարկով։Այդ օրվանից առ այսօր 128 դպրոցի մրցույթ է տեղի ունեցել, և ստեղծված իրավիճակի պատճառով պետությունն այդ դպրոցների կառուցման ընթացքում 120 մլն դոլարի կորուստ է ունեցել»,- նշել է նա։
