«Տաշիր» ընկերությունների սեփականատեր, բարերար Սամվել Կարապետյանի համախոհները, ովքեր այսօր հայտարարեցին «Մեր ձեւով» կամավորական շարժման հիմնադրման մասին, քաղաքական հայտ կներկայացնեն տարեվերջին։ Այն ներկայացվելու է հինգ աշխատանքային խմբերի կողմից կազմվելիք ամփոփ ծրագրերի արդյունքում։ Առաջնային ուշադրության կենտրոնում են լինելու տնտեսական քաղաքականությանը վերաբերող հարցերը։ Նախատեսվում է մշակել Հայաստանի տնտեսական զարգացման նոր մոդել։
«Տաշիր» ընկերությունների փոխտնօրեն Նարեկ Կարապետյանի համոզմամբ, առաջիկա ընտրություններում հայ ժողովուրդը մերժելու է եւ իշխանությունից հեռացնելու է գործող իշխանությանը՝ իր բնութագրմամբ՝ «փոքրիկ խմբակին»։ Ուստի իրենք խնդիր են դրել՝ ազգային ներուժի միավորման եւ համախմբման, որը հնարավորություն կտա 5-6 տարիների ընթացքում ապահովել Հայաստանի զարգացումը, որ կլինի բարեկեցիկ, պաշտպանված եւ աշխարհի բոլոր հայերի տունը։ Իր կարծիքով, հենց սա է իրական Հայաստանը։
Ինչ վերաբերվում է խաղաղության օրակարգին եւ անվտանգային հարցերին վերաբերվող մոտեցումներին, Նարեկ Կարապետյանը հայտարարեց․ «Խաղաղության օրակարգը առաջնային է Հայաստանի համար՝ վերջին 35 տարիների ընթացքում»։ Ինչ վերաբերվում է ներկայիս խաղաղության օրակարգին, նա պարզաբանեց՝ դեռ պետք է հասկանալ՝ դա իրակա՞ն խաղաղություն է, թե՞ ոչ։ Աշխատանքային խումբը կուսումնասիրի այդ ուղղությամբ փաստաթղթերն ու գործընթացները, որից հետո տեսակետը կամբողջացվի, իսկ մինչ այդ, ըստ բանախոսի, կան «ստորջրյա հարցեր, որոնք հանրությանը հայտնի չեն»։
Մանրամասները՝ տեսանյութում
Տնտեսական աշխատանքային խմբի ղեկավար, ֆինանսիստ, տնտեսագետ Աշոտ Ֆարսյանի համոզմամբ, Հայաստանի տնտեսությունը կարող է եւ պետք է փոխվի մեր կյանքի ընթացքում։ Իսկ մինչ այդ, ըստ բանախոսի, 2024-ի տվյալները բավական մտահոգիչ են․ «2024 թվականին Հայաստան ուղղված օտարերկրյա ներդրումները կազմել են 138,5 միլիոն դոլար, որը 10 անգամ ավելի քիչ է, քան եղել է նախատեսված կառավարության ծրագրով։ Հայաստանից 2024 թվականին եղել է 400 միլիոն դոլարի արտահոսք։ Այսքանով, մենք կարող ենք հաստատել, որ Հայաստանը ներդրողների համար գրավիչ չէ»։
Աշոտ Ֆարսյանի գնահատմամբ, Հայաստանի տնտեսությունն ունի լուրջ կառուցվածքային խնդիրներ․ «Մենք խնդիր ենք դրել մեր առջեւ շարունակական բարեփոխումների եւ թիրախավորված ներդրումների միջոցով կառուցել նոր տնտեսություն, որը կապահովի կայունություն, արժանապատվություն, բարեկեցություն մեր քաղաքացիների համար»։
Մանրամասները՝ տեսանյութերում
Գյուղատնտես Հարություն Մնացականյանն էլ ներկայացրեց այդ ոլորտի զարգացման տեսլականները։ Նրա փոխանցմամբ, Հայաստանում գյուղատնտեսական նշանակության 450 հազար հեկտար հողերից գրեթե կեսն է այսօր օգտագործվում, ոռոգման համակարգն էլ շատ բարդ վիճակում է։ Պարենային ինքնաբավության տեսանկյունից հացահատիկային եւ ընդեղեն բույսերից ընդամենը 20 տոկոսն է բավարարում մեր բնակչության ներկայիս պահանջմունքը, խոշոր եւ մանր եղջերավոր անասունների գլխաքանակն էլ տարեցտարի նվազում է։ Իսկ տեխնիկական պարկը հիմնականում խորհրդային ժառանգություն է։
Մանրամասները՝ տեսանյութում
ՏՏ ոլորտի զարգացման աշխատանքայի խմբի ղեկավար Ռոբերտ Կադարյանի բնութագրմամբ, շատ է խոսվում Հայաստանը տարածաշրջանային ՏՏ կենտրոն վերածելու գաղափարի մասին, սակայն գործնականում այս ուղղությամբ հանրությունը քայլեր չի տեսնում․ «ՏՏ ոլորտի մեր ընկերությունները ծառայություններ են մատուցում աշխարհի բազմաթիվ երկրներում, սակայն Հայաստանում ներգրավված են նրանց ընդամենը 10%–ը։ Ի՞նչ պետք է անել. սկսել պետական ծառայությունների ամբողջական թվայնացումից: Ներկայումս ունենք մի վիճակ, երբ առանձին-առանձին թվայնացված են հարկային, մաքսային, առողջապահական և այլ ոլորտներ, սակայն չկա մեկ ընդհանուր միասնական հավելված կամ էլեկտրոնային հարթակ, որը կմիավորի այս ամբողջը: Համախմբում ենք ամբողջ պետական ծառայությունները քաղաքացու բջջային հեռախոսի մեջ եւ տալով նրան հնարավորություն անկախ իր գտնվելու վայրից, հեշտությամբ օգտվելու պետական ծառայություններից։ Նմանատիպ օրինակների համար պետք չի գնալ Սինգապուր կամ Էստոնիա, մեր տարածաշրջանի երկրները վաղուց ունեն նմանատիպ գործիքներ, օրինակ Վրաստանում, Ռուսաստանում, Ղազախստանում, Ուկրաինայում։ Թվային ծառայությունները պետք է դառնան քաղաքացի–պետություն հարաբերություններն ավելի թափանցիկ դարձնելու գործիք եւ կարճ ժամանակում անցում կատարենք «zero click government» տեխնոլոգիաներին, երբ քաղաքացին այլևս չի դիմելու պետական հաստատություններին օրենքով սահմանված ծառայություններից օգտվելու համար։ Օրինակ, թոշակի տարիքը լրանալուց հետո մարդը չպետք է հավաքի փաստաթղթերի մի փաթեթ, ներկայացնի սոցիալ բաժին, սպասի որոշ ժամանակ, այլ համակարգը ավտոմատ պետք է նրան հաշվառի թոշակ ստացող քաղաքացիների ցանկում և նրան ծանուցում ներկայացնի։ Նույնը նաև երեխայի նպաստը ստանալու համար։ Եվ այս օրինակները կարելի է շարունակել»։
Բանախոսի դիտարկմամբ, Հայաստանը պետք է դիրքավորենք որպես ստարտափ հիմնելու եւ զարգացնելու համար նախատեսված երկիր։
Մանրամասները՝ տեսանյութում
Շարժումն առանձին աշխատանքային խմբով կուսումնասիրի եւ կներկայացնի Հայաստանի ժողովրդագրական խնդիրները։
Նարեկ Կարապետյանի դիտարկումներով, առաջիկա հարյուրամյակում Հայաստանի սուվերենության հիմնական սպառնալիքը բնակչության սակավաթիվ լինելն է։
Մանրամասները՝ տեսանյութում
Առանձնահատուկ ուշադրության կարժանանան երիտասարդության եւ սպորտի խնդիրները։
Մանրամասները՝ տեսանյութում
Ազգային արժեքների աշխատանքային խումբն էլ կզբաղվի ազգային արժեքներով ամուր հասարակություն ստեղծելու եւ այն ժամանակակից իրողություններին ինտեգրելու հարցերով։ Այդ ամենում առանձնահատուկ դեր կունենա Հայ Առաքելական Եկեղեցին։ Նարեկ Կարապետյանի փոխանցմամբ, Եկեղեցին մեր գոյության կոդն է եւ 21-րդ դարում մեծ անելիք ունի՝ ամուր, կիրթ եւ ժամանակակից հասարակություն կերտելու հարցում։
Մանրամասները՝ տեսանյութում
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
