ՀԱԿ փոխնախագահ Լևոն Զուրաբյանի ֆեյսբուքյան գրառումը
Այսօր, օգոստոսի 8-ին հայ-ամերիկյան հուշագրերի ստորագրումից երեք շաբաթ հետո Հայաստանի թափանցիկ կառավարությունը վերջապես, մեր պահանջների ճնշման ներքո, դրանք հրապարակեց, փարատելով այն մտահոգությունը, որ դրանցում թաքնված են «Զանգեզուրյան միջանցքի» կարգավորման այնպիսի դրույթներ, որոնք դեմ են գնում մեր ինքնիշխանությանն ու տարածքային ամբողջականությանը:
Հարցեր այնուամենայնիվ մնում են.
- Ինչո՞ւ է ԱՄՆ Նախագահ Դոնալդ Թրամփ հենց ստորագրման արարողության ժամանակ պնդել, որ Հայաստանը համաձայնվել է 99 տարով տրամադրել Ադրբեջանը Նախիջևանին կապող տրանզիտային միջանցք: Նույնը պնդում է նաև հեղինակավոր արևմտյան մամուլը:
- Արդյո՞ք այս պնդումները հիմնված են գաղտնի պահվող լրացուցիչ գրավոր, թե՞ ինչ-որ նախնական բանավոր պայմանավորվածությունների վրա:
- Ինչո՞ւ այդ փաստաթղթերը չէին հրապարակվել հենց ստորագրման օրը:
Եթե հրապարակված փաստաթղթերը սպառում են ձեռք բերված պայմանավորվածությունների ծավալը, դա իր մեջ երկու լուր է պարունակում, լավ և վատ:
Կարդացեք նաև
Լավը, ասված «եթե»-ի դեպքում, իհարկե, այն է, որ վաշինգտոնյան հուշագրերով մեր ինքնիշխանությանն ու տարածքային ամբողջականությանը որևէ անշրջելի հարված դեռ հասցված չէ:
Վատը, հատկապես Փաշինյանի կառավարության համար, այն է, որ ստորագրված փաստաթղթերը արժանի չէին այն թմբկահարմանը, որին նրանք արժանացան Հայաստանի կառավարության կողմից:
Պարզվում է, որ իրավական ուժ չունեցող և պարտավորություններ չառաջացնող այս փաստաթղթերի փաթեթի միակ նպատակն էր ընդամենը ընտրություններից առաջ Փաշինյանին` խաղաղության իբր հաստատման մասին խաբուսիկ մի փաստաթուղթ տրամադրելը:
