ՀՀ արտակարգ եւ լիազոր դեսպան Ձյունիկ Աղաջանյանը «Հայելի» ակումբում անդրադառնալով իշխանափոխությունից հետո ի հայտ եկած օլիգարխների թեմային՝ ասաց. «Կուզեմ այսօր ֆիքսել: Մեր պետությունը այնքան հետընթաց է ապրել թե կոռուպցիայի, թե փողերի լվացման տեսակետից, որ մեզ համար ուղղակի աներեւակայելի է: Սրա հետ երեւի ինչ-որ տեղ կարող ենք համեմատել 90-ական թվականների սկզբները:
Այսօր պետության կառավարման ղեկին նստած անձնավորության գաղափարային ամբողջ կառուցվածքը, ուղնուծուծը սառեցված է այն շրջանի մոտեցումների ու գաղափարների վրա: Բայց այսօրվա ծավալները, մեթոդները ուղղակի աներեւակայելի են: Ես սարսափում եմ, թե ինչ աստիճանի է, որ արդեն կոծկել չեն կարողանում եւ այստեղից ու այնտեղից ամենօրյա ռեժիմով ցայտում է ու հանրային տեղեկատվության աղբյուր դառնում: Այսինքն, կոռուպցիան համատարած է: Ու դա գալիս է նրանից, որ հսկայական գումարներ են ներթափանցում մեր պետություն ու արեւմտյան օղակներից ֆինանսավորում են իշխանություններին ու նրանց արբանյակ ծառայող կազմակերպություններին եւ անձանց, որպեսզի շարունակեն հանրության ուղեղները լվանալ, բթացման պրոցեսով կարողանան իրենց աշխարհաքաղաքական ծրագիրը առաջ տանել: Նաեւ հանցավոր գործունեության արդյունքում, որի ամենացայտուն դրվագներից մեկը 4 տոննա կոկաինի Հայաստան մտնելն էր:
Իրենք մի կողմից հիվանդ մարդու ենթադրյալ ինչ-որ ահաբեկչական գործունեության հետ կապված կարող են օրերի ընթացքում պարզաբանումներ տալ եւ քննություն ու դատավարություն իրականացնել, եւ մյուս կողմից կա խայտառակ ծավալի թմրանյութ, որպիսի բան Հայաստանը երբեք չի ունեցել: Խոսում ենք 4 տոննա կոկաինի մասին: Ընդ որում, դա բացահայտված մասն է: Ինչքա՜ն է անցել-դարձել, որ այս ուղին իրենց համար դարձել է ընդունելի եւ ծավալուն, որովհետեւ սովորաբար թմրանյութերի միջազգային վաճառքով զբաղվող օղակները փորձում են տարբեր խողովակներ: Եվ միայն սահուն անցնելու դեպքում են մեծացնում ծավալները»,-ասաց դիվանագետը:
Ձյունիկ Աղաջանյանը նշեց, որ բացառում է այդ ծավալների թմրանյութի ազատ շրջանառությունը մեր երկրի տարածքով առանց իշխանության իմացության: «Եվ արդեն որեւէ նախարարի կամ որեւէ պաշտոնյայի հանցագործությունը Նիկոլ Փաշինյանին է վերագրվելու, քանի որ երկրի ղեկավարը երեկ խոստովանություն արեց չէ՞, որ կառավարությունը ինքն է»:
Կարդացեք նաև
Այնուհետեւ, բերելով Աֆղանստանի օրինակը, նախկին դեսպանը նշեց. «Եկեք հասկանանք, որ ցանկացած տեղ, ուր Ամերիկան կամ Արեւմուտքը ոտք է դնում, առաջին գործողություններից մեկը լինում է թմրանյութերի օգտագործման ծավալների աճը, ինչը մենք տեսանք նաեւ Վրաստանում, եւ երկրորդը՝ հանցագործության ծավալների մեծացումը: Սա երկու հիմնական նպատակ ունի: Թմրանյութերի ծավալների մեծացումը սկսվում է երեխաների, երիտասարդների շրջանում, որը նպատակ ունի կոտրելու հանրային ընդվզման պոտենցիալը: Այդ սերունդն է, որ ամենաակտիվն ու ամենաըմբոստն է իր բնական պահվածքով: Երկրորդ՝ նրանց դնում են կախվածության մեջ՝ ֆինանսական, պարտքային, թմրանյութերից: Մարդիկ կարող են թմրանյութերի ազդեցության տակ հանցանք գործել եւ դրանով եւս կախվածության մեջ հայտնվել այդ օղակներից:
Այսինքն, գործում է մի մշակված համակարգ, որը նպատակաուղղված է հայկական հանրության, հատկապես երիտասարդ սերնդի ոչնչացմանը որպես ընդհանրապես ընդդիմադիր եւ իր պահանջները ներկայացնող գործոն:
Սա թող մեր հանրությունը, ծնողները ականջին օղ անեն: Հատկապես այն ծնողները, որոնք երեխաներ ունեն դպրոցում: Մինչեւ 30-33 տարեկանը բոլորը հստակ թիրախավորված են: Եվ պատահական չէ, որ մեզ մոտ այդքան խաղամոլությունը մեծացավ, պատահական չէ, որ թմրանյութերի շրջանառությունն է մեծացել, ամենօրյա ռեժիմով ունենք հանցագործություններ, ծանր հանցագործություններ՝ դանակահարություն, կրակոց եւ այլն»,-ասաց Ձյունիկ Աղաջանյանը:
Աշոտ ՀԱԿՈԲՅԱՆ
