Վրաստանի նախագահ Միխեիլ Կավելաշվիլին ֆեյսբուքյան իր էջում բաց նամակով դիմել է ԱՄՆ նախագահ Դոնալդ Թրամփին
Բաց նամակ
Ամերիկայի Միացյալ Նահանգների նախագահ, պարոն Դոնալդ Թրամփին
Նախ՝ կցանկանայի վերահաստատել խորին հարգանքս Ձեր հանդեպ, որպես Ամերիկայի ժողովրդի կողմից ընտրված առաջնորդի: Եվս մեկ անգամ հույս եմ հայտնում, որ Ձեր նախագահությունը կուժեղացնի Միացյալ Նահանգները եւ ավելի մեծ բարգավաճում կբերի ամերիկյան ժողովրդին, ինչպես նաեւ խաղաղություն, անդորր՝ աշխարհին:
Ինչպես բազմիցս հրապարակայնորեն հայտարարել են Վրաստանի կառավարության ղեկավարները, Միացյալ Նահանգների հետ հարաբերությունների վերսկսումը եւ նոր էջից երկու երկրների միջեւ ռազմավարական գործընկերության թարմացումը Վրաստանի արտաքին քաղաքականության գլխավոր առաջնահերթություններից է:
Հիշեցնեմ՝ վերոնշյալ ռազմավարական գործընկերությունը դադարեցվել է Բայդենի վարչակազմի կողմից Ձեր՝ ԱՄՆ նախագահ ընտրվելուց հետո, Ձեր երդմնակալությունից մի քանի շաբաթ առաջ՝ որպես մի շարք ինքնիշխան պետությունների նկատմամբ վարած անարդար, կոշտ և ագրեսիվ քաղաքականության մաս:
Կարդացեք նաև
Այս ֆոնին, ցավով պետք է նշել ևս մեկ անգամ, որ Ձեր վարչակազմը պատշաճ ուշադրություն չի դարձնում Վրաստանին, ինչը, կառավարությունների միջև լիակատար արժեքային համապատասխանության ֆոնին, վրաց հասարակության զարմանքն է հարուցում: Հարցերը, որոնց վրա այսօր կենտրոնացած է Ձեր վարչակազմը, տարիներ առաջ քննարկվել են Վրաստանի իշխող թիմի կողմից։
Սակայն, չնայած նույնական աշխարհայացքին, որքան էլ զարմանալի լինի, Ձեր վարչակազմի փոխարեն Վրաստանում, ցավոք, դեռևս գործում է «Deep State»-ը (ստվերային իշխանություն, խորքային պետություն- «Ա.»), որն, օգտագործելով USAID-ի (United States Agency for International Development, ԱՄՆ միջազգային զարգացման գործակալություն), NED-ի (National Endowment for Democracy, Ժողովրդավարության ազգային հիմնադրամ), և այլ նմանատիպ կազմակերպությունների օրինակով հաստատված ավանդական կոշտ մեթոդները, դեռևս փորձում է անկայունություն մտցնել և խաթարել Վրաստանում խաղաղությունը։
Բարեբախտաբար, «Deep State»-ի դեմ պայքարում վրաց ժողովուրդը միասնական է, ինչպես երբեք, ինչը մեր հայրենակիցները բազմիցս ապացուցել են վերջին չորս տարիների ընթացքում։ Վրաստանում «խորքայինը պետության» կողմից կազմակերպված հեղափոխության 4 փորձերը խափանվել են, առաջին հերթին, վրաց ժողովրդի իմաստության, փորձի և սկզբունքայնության շնորհիվ։
Հատկանշական է, որ Ձեր նախագահության մի քանի ամիսների ընթացքում դուք սերտ հարաբերություններ եք հաստատել Վրաստանի բոլոր հարեւան երկրների հետ, հաջողությամբ հեշտացրել եք Ադրբեջանի եւ Հայաստանի միջեւ խաղաղության համաձայնագրի կնքումը, ակտիվորեն համագործակցում եք Թուրքիայի կառավարության հետ, վերականգնել եք գործընկերությունը նույնիսկ Վլադիմիր Պուտինի հետ:
Սակայն այս ֆոնին Ձեր վարչակազմը ոչինչ չի ասում Վրաստանի մասին, ինչը, ինչպես արդեն նշել եմ, վրաց հասարակությանը զարմանք է պատճառում:
Ասում են՝ անցած ամիսներին Դուք փոխել եք աշխարհի կեսը։ Այնուամենայնիվ, բնականաբար, յուրաքանչյուրն իրերին նայում է իր տեսանկյունից եւ հաշվի առնելով, որ ձեր վարչակազմը որեւէ տրամաբանական ուշադրություն չի դարձնում մեր երկրին, վրաց ժողովրդի մոտ ձեր պասիվությունը կասկածներ եւ հարցեր է առաջացնում, թե որքան ազատ եւ անկեղծ են ձեր վարչակազմի գործողությունները տարածաշրջանում խաղաղության առումով:
Վրաց հասարակությունը մտահոգված է Վրաստանում պատերազմի եւ քաոսի վրա հիմնված «Deep State»-ի գերակայությամբ, որին ցավոք Ձեր վարչակազմը պասիվ է դիտարկում:
Հույս ունեմ, որ Ձեր վարչակազմի վերաբերմունքը Վրաստանի նկատմամբ կփոխվի: Կարեւոր է, որ վրաց ժողովրդի ընկալման մեջ Ամերիկայի Միացյալ Նահանգները ասոցացվի ոչ թե «Deep State»-ի, այլ ԱՄՆ ուժեղ նախագահի հետ, ոչ թե խաղաղությունը խաթարելու եւ ապակայունացնելու մշտական փորձերի, այլ խաղաղության եւ կայունության հետ, ոչ թե գենդերային ու ԼԳԲՏ պրոպագանդայի, այլ՝ ավանդական արժեքների հանդեպ հարգանքի։
Անձամբ ես, որպես Վրաստանի նախագահ, պատրաստ եմ առավելագույնս նպաստել Վրաստանի կառավարության նպատակի իրագործմանը՝ նոր էջից եւ կոնկրետ ճանապարհային քարտեզի հիման վրա վերականգնել Վրաստանի եւ Ամերիկայի Միացյալ Նահանգների միջեւ ռազմավարական գործընկերությունը:
Այս նպատակին հասնելու անհրաժեշտ պայման է վրաց պետության եւ վրաց ժողովրդի նկատմամբ ձեր վարչակազմի արդար եւ մտածված վերաբերմունքի հաստատումը:
Խորին հարգանքով՝
Միխեիլ Կավելաշվիլի,
Վրաստանի նախագահ
