Այս տարվա սկզբին ԿԳՄՍ նախարարն ու Երեւանի քաղաքապետը հուշագիր ստորագրեցին, որով որոշում կայացրին Հանրապետության 32 հասցեում գտնվող հուշարձան-շենքում հիմնել հողարվեստի ուղղության հիմնադիր, նկարիչ, հավաքորդ Մարկոս Գրիգորյանի թանգարան, նաեւ հայտարարեցին, որ այս տարի նշվում է Մարկոս Գրիգորյանի ծննդյան 100-ամյակը:
Aravot.am-ը ԿԳՄՍ նախարար Ժաննա Անդրեասյանի անունով հարցում էր ուղարկել, հետաքրքրվել էինք՝ արդեն տարվա մեծ մասն անցել է, ի վերջո ե՞րբ են նախատեսված պետական մակարդակով Մարկոս Գրիգորյանի հոբելյանին նվիրված միջոցառումները:
Մեր հարցմանը պատասխանել է ԿԳՄՍ նախարարի տեղակալ Ալֆրեդ Քոչարյանը: ԿԳՄՍ պատասխանում ընդամենը նշված է, որ նախարարի հրամանով ստեղծվել է Մարկոս Գրիգորյանի ծննդյան 100-ամյակի հոբելյանական միջոցառումները համակարգող հանձնաժողով, հրատարակության է պատրաստվում Մարկոս Գրիգորյանի ստեղծագործական ժառանգությանը նվիրված հոբելյանական պատկերագիրք, եւ Եղիշե Չարենցի անվան գրականության եւ արվեստի թանգարանում ընթացքի մեջ են Մարկոս Գրիգորյանի հավաքածուի ցուցասրահի կազմակերպման աշխատանքները:
Կարդացեք նաև
Նշենք, որ Եղիշե Չարենցի անվան Գրականության եւ արվեստի թանգարանի հարկի ներքո գտնվող Միջին Արևելքի արվեստի թանգարանում արդեն իսկ ներկայացված են Մարկոս Գրիգորյանի հեղինակային ստեղծագործությունները եւ նրա՝ 1993թ թվականին Հայաստանին նվիրաբերված հավաքածուն, հետեւաբար պարզ չէ, թե ինչ նկատի ունի նախարարի տեղակալը՝ Եղիշե Չարենցի անվան գրականության եւ արվեստի թանգարանում Մարկոս Գրիգորյանի հավաքածուի ցուցասրահի կազմակերպման աշխատանքներ ասելով:
Գոհար ՀԱԿՈԲՅԱՆ
Լուսանկարները տրամադրել է Մարկոս Գրիգորյան հիմնադրամի ղեկավար Միշել Ալլահվերդյանը
