Աշխատանքի եւ սոցիալական ապահովության հարցերի նախարար նշանակված ՔՊ-ական նախկին պատգամավոր Արսեն Թորոսյանն այսօր առաջին անգամ, նոր կարգավիճակում ճեպազրույցի էր եկել եւ վեճի բռնվեց լրագրողների հետ։ Վեճի պատճառն այն էր, որ լրագրողները նրան խնդրեցին մի փոքր բարձր խոսել։
«Ժողովուրդ ջան, տեխնիկա ունեցեք, լսեք ձայնս, հո չե՞մ գոռալու, այ քեզ բան․․․»,- վրդովվեց Արսեն Թորոսյանը։
«Ունա՞կ եք լսելու, թե՞ չէ, երբ հարց եք տալիս, թույլ տվեք մինչեւ վերջ պատասխանեմ, թե չէ չեմ անի ընդհանրապես»,- վրդովվեց ՔՊ-ականը։
Լրագրողները հորդորեցին չսպառնալ։
Կարդացեք նաև
«Կսպառնամ… դուք էլ էդ տոնով չխոսեք։ Շնորհակալություն, ցտեսություն»,- ասաց նա եւ հեռացավ։
Իսկ մինչ այդ հարց էր հնչել՝ ինքն ի՞նչ կապ ունի ոլորտի հետ, որ նախարար է նշանակվել։ Նա պատասխանեց, որ նախարարի պաշտոնը քաղաքական է, ինքն էլ քաղաքական թիմի անդամ է։ Նաեւ ասաց, որ միգուցե ընթացիկ կադրային փոփոխություններ լինեն՝ օրենքով սահմանված գործընթացով։
Դիտարկմանը, որ կար ժամանակ, որ ինքը հայտնվել էր Նիկոլ Փաշինյանի «սեւ ցուցակում», հակադարձեց․ «Ես երբեք որեւէ մեկի սեւ ցուցակում չեմ եղել, դա ձեր վառ երեւակայությունն է»։
Նելլի ԳՐԻԳՈՐՅԱՆ
