Հայկական բրենդիի կայուն բարձր որակի ապահովման նպատակով այն որպես աշխարհագրական նշումով ապրանք գրանցելուն ուղղված աշխատանքների շրջանակներում սեպտեմբերի 2-3-ը Ծաղկաձորում կազմակերպվել է հերթական աշխատաժողովը:
Քննարկվել են «Հայկական բրենդի» աշխարհագրական նշման արտադրանքի տեխնիկական բնութագրի նախագիծը, հայկական բրենդի արտադրողների ասոցիացիայի առաքելությունը, աշխարհագրական նշման լոգոտիպը, աշխարհագրական նշման արտադրողների ասոցիացիայի մարքեթինգային ռազմավարությունը և այլ հարցեր։
Աշխատաժողովին մասնակցել են ՀՀ էկոնոմիկայի նախարարի տեղակալներ Արման Խոջոյանը և Անուշիկ Ավետյանը։ Նախարարի տեղակալներն իրենց ելույթներում նշել են ծրագրի կարևորությունը գյուղատնտեսության, մասնավորապես՝ կոնյակագործության ոլորտի հետագա կայուն զարգացման և շուկաների դիվերսիֆիկացման համար։
Միաժամանակ առաջարկվել է իրականացվող աշխատանքները կազմակերպել ըստ առաջնահերթությունների, մասնավորապես անդրադառնալ թողարկվող արտադրանքի որակի նկատմամբ վերահսկողության բարձրացման նպատակով անհրաժեշտ համակարգային գործողությունների ապահովմանը։
ՀՀ էկոնոմիկայի նախարարություն
