Փրկարարի օրվա առիթով, որ Հայաստանում նշվում է 2008 թվականից, այսօր Ազատության հրապարակում հատուկ տակտիկական ուսումնավարժանքից հետո ՆԳ նախարար Արփինե Սարգսյանը լրագրողների հետ ճեպազրույցում Հայաստանի փրկարար ծառայության նյութական հագեցվածությունը եւ պատրաստ լինելը ճգնաժամային իրավիճակներին գնահատեց բավարար:
«Փրկարարները միշտ հավուր պատշաճի իրականացրել են իրենց աշխատանքը: Մենք ուզում ենք էլ ավելի բարձրացնել մեր կարողությունները:
Այս տարվա կտրվածքով արդեն իսկ ունենք բյուջետային հատկացումներ 26 հրշեջ-փրկարարական գույքի ձեռքբերման համար, որը կգա համալրելու հրշեջ-փրկարարական գույքի մեր պարկը եւ մեր ծառայողները կկարողանան տարբեր մարզերում ավելի օպերատիվ ծառայություններ իրականացնել: Արդեն իսկ երկու չափաբաժնով ունենք հաղթող ընկերություն եւ, կարծում եմ, առաջիկայում ձեռք կբերենք հրշեջ-փրկարարական գույք՝ մեքենաներ, ինչը կօգնի ավելի օպերատիվ սպասարկել ահազանգերը:
Կարդացեք նաև
Այս տարի ունենք բազմաթիվ նոր ձեռքբերումներ, որոնք առաջին հայացքից կարող են թվալ փոքր դետալներ, բայց մենք դրանք ամբողջության մեջ դիտարկում ենք կենսական նշանակություն ունեցող գործիքներ:
Երեւան համայնքի դեպքում ձեռք ենք բերել երկու մարտական հաշվարկի համար նախատեսված հատուկ համազգեստ, որը ստանդարտ համազգեստը չէ՝ ավելի բարձրորակ է եւ ավելի բարձրարժեք»,-ասաց տիկին նախարարը:
Արփինե Սարգսյանը նշեց, որ հայտարարվել է ստանդարտ մրցույթ եւ այս պահի դրությամբ կա հաղթող ընկերություն, որը հայաստանյան ՍՊԸ է: Սակայն իրենք սահմանել են մի շարք չափորոշիչներ, որոնք ենթադրում են բարձրորակ հրշեջ-փրկարարական գույքի իրացում:
Աշոտ ՀԱԿՈԲՅԱՆ
