«Միջանցք անունով ոչինչ գոյություն չունի․ խոսք է գնում ճանապարհի մասին։ Ո′չ խաղաղության պայմանագրում, ո′չ նախաստորագրված հռչակագրում միջանցքի մասին խոսք չի գնում։ Ոչ մի միջանցք չի լինելու»,- լրագրողների հարցին՝ Դուք շարունակո՞ւմ եք պնդել, որ միջանցք չի լինելու, թեև Իլհամ Ալիևն օգտագործում է միջանցք եզրույթը, խորհրդարանում լրագրողների հետ ճեպազրույցում այսպես պատասխանեց Իրանի դեսպան Մեհդի Սոբհանին։
Հարցին՝ եթե Ադրբեջանը փորձի միջանցք բացել, Թեհրանն ինչի՞ է պատրաստ, Իրանի դեսպանը պատասխանեց․ «Ոչ մի միջանցք չի լինելու, ոչ մի բան զոռով չի լինելու»։
Լրագրողները հետաքրքրվեցին՝ ի՞նչ նպատակով էր Իրանի դեսպանն այցելել խորհրդարան։ Ի պատասխան նա հայտնեց, որ խորհրդարանական համագործակցությունների համատեքստում է, պատրաստվում են հյուպատոսական համատեղ հանձնաժողով կազմակերպել։
Կարդացեք նաև
ԱԺ պաշտոնական հաղորդագրության համաձայն՝ «ՀՀ ԱԺ նախագահի տեղակալ Ռուբեն Ռուբինյանը սեպտեմբերի 9-ին հանդիպել է ԻԻՀ արտաքին գործերի նախարարի տեղակալ Վահիդ Ջալալզադեի հետ:
«Բարեկամ Իրանի հետ փոխադարձ հարգանքի ու վստահության վրա կառուցված երկկողմ հարաբերությունները մեծ կարեւորություն ունեն Հայաստանի համար: Իսկ փոխայցերն օգնում են առավել ընդգրկուն դարձնել երկկողմ օրակարգը՝ միաժամանակ շարունակելով ակտիվ երկխոսությունն ու սերտ համագործակցությունը»,- ասել է Ռուբեն Ռուբինյանը:
Զրուցակիցները քննարկել են տարածաշրջանային վերջին զարգացումները:
Վահիդ Ջալալզադեի խնդրանքով Ռուբեն Ռուբինյանը ներկայացրել է մանրամասներ Հայաստան-Թուրքիա հարաբերությունների կարգավորման գործընթացի վերաբերյալ»:
Տաթև ՀԱՐՈՒԹՅՈՒՆՅԱՆ
