Սեպտեմբերի 10-ին, Յութա նահանգում հրազենային հարձակումից սպանվել է կոնսերվատիվ ակտիվիստ 31-ամյա Չարլի Քիրկը։
Դեպքը տեղի է ունեցել Օրեմ քաղաքի Ութահ Վելլի համալսարանում՝ «American Comeback Tour» հանրային միջոցառման ընթացքում։ Turning Point USA կազմակերպության հիմնադիր Քիրկը վիրավորվել է պարանոցի շրջանում և տեղափոխվել հիվանդանոց, որտեղ բժիշկները արձանագրել են նրա մահը։
Միջոցառմանը ներկա էր շուրջ 3 հազար մարդ, այդ թվում՝ Քիրկի կինը և երկու երեխաները, որոնք չեն տուժել։ Հետաքննությունը շարունակվում է, սակայն ոստիկանությունը դեռ պաշտոնապես չի հայտնել հարձակվողի ինքնության մասին։
Իրավապահները միջադեպը որակում են որպես քաղաքական սպանություն։ Նախնական տվյալներով՝ կրակոցը հնչեցվել է համալսարանի մոտակա շենքի տանիքից։ Հանցագործը դեռ չի հայտնաբերվել, տարածքում շարունակվում է լայնածավալ որոնողական գործողություն։
Կարդացեք նաև
Չարլի Քիրկը համարվում էր ԱՄՆ-ում ամենաազդեցիկ երիտասարդ կոնսերվատիվ գործիչներից մեկը և Դոնալդ Թրամփի մերձավոր դաշնակիցը։ Նրա սպանությունը մեծ արձագանք է գտել թե՛ ԱՄՆ-ում, թե՛ միջազգային հարթակներում․ Թրամփը կարգադրել է իջեցնել պետական դրոշները, իսկ ԱՄՆ նախկին նախագահներ Ջո Բայդենն ու Բարաք Օբաման, ինչպես նաև մի շարք այլ երկրների ղեկավարներ, դատապարտեցին հարձակումը։
Նկատենք, որ Քիրկը հայտնի էր իր հակաուկրաինական դիրքորոշմամբ, Զելենսկուն համարում էր ԿՀՎ-ի գործակալ, համարում էր, որ Ղրիմը ռուսական է եւ այլն:
