«Սա բխում է բացառապես Ադրբեջանի պահանջներից և արվում Ադրբեջանի թելադրանքով։ Սա հերթական պահանջներից մեկն էր, որ հայկական զինված ուժերը պետք է սահմանափակվեն, սպառազինությունները սահմանափակվեն, ապառազմականացվեն, հիմա իրենք գնում են այդ ուղղությամբ՝ դա ներկայացնելով իբրև խաղաղության հասնելու հերթական հնարավորություն»,-լրագրողների հետ ճեպազրույցում ասաց «Հայաստան» խմբակցության պատգամավոր Իշխան Սաղաթելյանը՝ անդրադառնալով պարտադիր զինվորական ծառայությունը կես տարով կրճատելու հետ կապված մտադրություններին։
Անդրադառնալով ՀՀ վարչապետ Նիկոլ Փաշինյանի այն հայտարարություններին, թե խաղաղություն է հաստատվել, Իշխան Սաղաթելյանը նշեց․ «Ադրբեջանի պահանջների կատարումը՝ հերթական զիջումներով, փորձում են ներկայացնել խաղաղություն»։
Ի պատասխան ՀՀ ԱԺ նախագահ Ալեն Սիմոնյանի այն պնդումների, թե իրենք մրցակից չունեն, խորհրդարանում չկա ընդդիմություն, անգամ իր նկարի շուրջ ավելի շատ մարդ կհավաքվի, քան ընդդիմության, Իշխան Սաղաթելյանն ասաց․ «Իր նկարը, որ դնեն, մարդ կհավաքվի, բայց այդ մարդիկ ինչ կանեն այդ նկարի հետ, թող այդ մասին մտածի։ Հանրային ընկալումը իրենց մասին բոլորս գիտենք՝ ինչ է։ Մենք իրենց հետ չենք կարող մրցակից լինել ստի, կեղծիքի, սրիկայության և մնացած բոլոր բնագավառներում, բայց երկիրը ստեղծված իրավիճակից դուրս բերելու իմաստով իրենք ասելիք չունեն։ Իրենք իրավունք չունեն խոսելու ոչ խաղաղության, ոչ ապագայի մասին»։
Ըստ Իշխան Սաղաթելյանի՝ եթե 24 ժամ Նիկոլ Փաշինյանի ուժային կառույցները դադարեցնեն մարդկանց նկատմամբ բռնությունները, ապօրինությունները, կտեսնենք՝ դրանից հետո ինքը քանի՞ ժամ կմնա իշխանության․ «Էս մարդու օրոք քաղբանտարկյալների թիվն է ավելանում։ Բա եթե ժողովուրդը ձեզ ընդունում է, անընդհատ դիմադրության օջախները ինչի՞ եք ջարդում, էդ «հարմար» ընդդիմությանն ինչի՞ եք էդքան բռնում»։
Կարդացեք նաև
Տաթև ՀԱՐՈՒԹՅՈՒՆՅԱՆ
