57 կգ քաշային ազատ ոճի ըմբիշ Արսեն Հարությունյանը հրաշալի մրցելույթներ է ունենում Զագրեբում երեկ մեկնարկած մեծահասակների աշխարհի առաջնությունում: Նախնական գոտեմարտերում ուկրաինացի եւ մոնղոլ մրցակիցների նկատմամբ «չոր» հաշվով առավելության հասնելուց հետո Եվրոպայի մեր քառակի չեմպիոնը գորգում հանդիպեց 2024 թվականի Փարիզի օլիմպիական խաղերի արծաթե մեդալակիր եւ նույն թվականի Պանամերիկյան առաջնության հաղթող, ամերիկացի Սպենսեր Լիի հետ, որը նաեւ այս քաշային կարգում UWW վարկանիշային դասակարգման 2-րդ համարն է:
Մեր ըմբիշը գերազանց անցկացրեց նաեւ այս գոտեմարտը եւ իր բացահայտ առավելությունն ամրագրեց 14:3 ջախջախիչ հաշվով: Այսօր երեկոյան կիսաեզրափակչում Արսենը ուժերը չափելու է կորեացի Չոնգսոնգ Հանի հետ:
Աշոտ ՀԱԿՈԲՅԱՆ
