Երեւան քաղաքի ընդհանուր իրավասության դատարանի «Կենտրոն» նստավայրում դատավոր Սաթենիկ Անդրեասյանի նախագահությամբ կայացած «ՍԴ դատավորների գործով» մեղադրյալի կարգավիճակում հայտնված հասարակական-քաղաքական գործիչ Էդգար Ղազարյանը այսօր ցուցմունքներ տվեց՝ պատասխանելով իր պաշտպանի, հանրային մեղադրողի հարցերին:
Նա դատարանի դահլիճում հայտարարեց, որ նախաքննական փուլում հրաժարվել էր ցուցմունք տալ Քննչական կոմիտեում՝ այդ կառույցի նկատմամբ վստահության ցածր մակարդակով պայմանավորված:
Կարդացեք նաև
Դատարանի դահլիճում Էդգար Ղազարյանը հնարավորինս հանգամանալից պատասխանում էր իր պաշտպանի եւ հանրային մեղադրողի հարցերին, թեեւ վերջինը պարբերաբար նշում էր, թե միշտ չէ, որ պատասխաններն իրեն գոհացնում են:
Դրվագներից մեկում Հայկ Ավետյանը բավականին էմոցիոնալ արձագանքելով իր հերթական հարցին Էդգար Ղազարյանի պատասխանին եւ ընդհատելով նրան՝ դատավորին հորդորեց նշել, որ նա պատասխանում է հարցերին եւ ոչ թե ելույթներ է ունենում, ինչին դատավորը հստակ հակադարձեց. «Նստեք: Դատավորը մեղադրյալի խոսքն ընդհատելու իրավունք չունի: Խոսքը դեռ չի ավարտել, առաջին նախադասությունը նոր է սկսում: Եթե դատարանը գտնի, որ ոչ վերաբերելի խոսույթ է արտահայտվում, համոզված եղեք՝ առանց ձեր հորդորի դատարանը միանշանակ կընդհատի»:
Աշոտ ՀԱԿՈԲՅԱՆ
