Այսօր Գեղարքունիքի մարզի Սեւանի նստավայրում Ազատ գյուղի զինվորական կացարանում բռնկված հրդեհի ու դրա հետեւանքով 15 զինվորի մահվան դեպքի քննության գործով դատական նիստում հարցաքննվեց ավագ հրշեջ փրկարար Հայկարամ Վարդանյանը:
Նա պատմեց, որ դեպքի օրը հերթապահության չի եղել, իրեն կանչել են տնից, հասել է դեպքի վայր, երբ արդեն կացարանի տանիքը փլված է եղել, որոնողական աշխատանքներ են սկսել, ձեռքերով ու բահերով մաս -մաս մաքրելով՝ առաջ են գնացել, փորձելով հանել տուժածներին:
-Տանիքը նստած էր, դիմացի հատվածը փլված էր, դիմացս տուժած կար, սկսել ենք հենց այդտեղից աշխատանքներ անել,- պատմեց վկան:
Կարդացեք նաև
Առաջ գնալով՝ վկան 2-3 զինծառայողի տեսել է մահճակալի տակ իրար փաթաթված, մի հոգի էլ ճաղավանդակի մոտ էր՝ մեջքը հենված մահճակալին ուղիղ դիրքում, ըստ վկայի՝ այդպես մնացել էր ճաղավանդակի լուսամուտին, ոտքերը մասամբ մոխրացած էին:
Նրա խոսքով՝ դեպքի վայրում լսել է՝ մի հոգի վառված դուրս է եկել, հետագա խոսակցությունները, ասաց՝ չի հիշում:
Տուժողների ներկայացուցիչ Նորիկ Նորիկյանի հարցին՝ իր տպավորությամբ զինծառայողները թաքնվելու համա՞ր էին հայտնվել մահճակալի տակ, տանիքի փլուզմա՞ն, թե՞ այլ պատճառով:
-Իմ տպավորությամբ` ծխից պատսպարվել են,- պատասխանեց վկան:
Նորիկյանի հաջորդ հարցին՝ ինչո՞ւ միջոցներ չեն ձեռնարկել դուրս գան մահճակալի տակից, վկան պատասխանեց՝ այդ հարցի պատասխանը չունի:
Հաջորդ հարցին՝ որտեղի՞ց են դուրս բերել առաջին դին, վկան պատասխանեց՝ իր հիշելով վառարանի կողքից:
Նորիկ Նորիկյանն արձանագրեց, որ վառարանի մոտ գտնված դիակի հանգամանքը շատ էական նշանակություն ունի գործի քննության համար:
-Հայտնաբերված այդ դին քնած զինծառայողներից մե՞կն է եղել, թե՞ այդ մահացած զինծառայողը կացարանում չի եղել: Եթե մեկ զինվորի հաջողվել է գալ, հասնել վառարանի մոտ, միգուցե մնացածին էլ կարող էր հաջողվել, օրինակ` մահճակալի տակ իրար փաթաթված այն երեք տղաներին, մահճակալի տակ հայտնվելու փոխարեն շարժվել, դուրս գալ:
Այս վկան մի կարեւոր մանրամասն էլ հիշեց, որ իր տեսած տուժածների մեջ կային ե՛ւ հագուստով, ե՛ւ մասամբ հագուստով, ինչպես նաեւ բուշլատով զինվորներ:
-Բուշլատը քնած զինվորի հագին ի՞նչ գործ ուներ: Հիմա զինվորները քնե՞լ են, թե՞ բուշլատ են հագել. բուշլատը քնած զինվորի հագին ի՞նչ գործ ուներ. շիլաշփոթ է,- զարմացավ Նորիկյանը:
-Ես այդ հարցի պատասխանը չունեմ,- պատասխանեց վկան:
Արփինե ՍԻՄՈՆՅԱՆ
