Խստորեն դատապարտում ենք Մերձավան բնակավայրում տեղի ունեցած զինված հարձակումը, որի հետևանքով սպանվել են Փարաքար համայնքի ղեկավար Վալոդյա Գրիգորյանը և քրեական ոստիկանության ծառայող Կարեն Աբրահամյանը, և վիրավորվել է մեկ քաղաքացի։
Մեր խորին ցավակցություն ենք հայտնում զոհվածների ընտանիքներին, հարազատներին, համայնքի բնակիչներին ու բոլոր նրանց, ովքեր կիսում են այս մեծ վիշտը։
Վիրավորում ստացած քաղաքացուն մաղթում ենք շուտափույթ ապաքինում։
Տեղի ունեցածը հերթական անգամ ապացուցում է, որ Հայաստանի Հանրապետությունում տարիներ շարունակ թուլացվում են պետական ինստիտուտները, խորանում է անպատժելիությունը, իրավապահ համակարգն իրականացնում է ընտրովի արդարադատություն, իսկ առկա ներուժն օգտագործվում է քաղաքական հետապնդումների նպատակով:
Կարդացեք նաև
Հետևանքները չեն ուշանում՝ հասարակական անվտանգությունը գտնվում է լրջագույն սպառնալիքի տակ։ Այս հանցագործությունը հարված է ոչ միայն առանձին քաղաքացիներին, այլև մեր պետության ու պետականության հիմքերին։
«Իրական Հայաստան» հռչակած իշխանությունը տարիներ շարունակ զբաղված է մտացածին սպառնալիքներ «կանխելով», երկրում ստեղծելով քրեածին միջավայր: Ավելին, պարբերաբար հնչող բռնության ու հաշվեհարդարի կոչերով, հանրությանը «սևերի ու սպիտակների» բաժանելով՝ պարարտ հող են ստեղծել նման հանցագործությունների համար, որոնց թիվը թռիչքաձև աճում է:
Իշխանությունը քրեականացնում է այլախոհությունը, հալածում հոգևորականներին ու ընդդիմախոսներին, միաժամանակ՝ քաղաքացիներին թողնելով անպաշտպան զինված հանցագործների դեմ։
Սա արդեն ոչ թե անգործություն է, այլ ուղղակի հանցակցություն։
Պահանջում ենք իրավապահ մարմիններից՝ անհապաղ և ամբողջական բացահայտել դեպքը, ինչպես նաև օրենքի ողջ խստությամբ պատասխանատվության ենթարկել մեղավորներին։
ՀՅԴ Հայաստանի Գերագույն Մարմին
