Aravot.am-ի տեղեկություններով` ոստիկանությունում ստացված օպերատիվ տեղեկությունների հիման վրա ձեռնարկված միջոցառումների արդյունքում փաստական տվյալներ են ձեռք բերվել այն մասին, որ Ռ. Ա.-ն, 2019 թ. փետրվար ամսից մինչեւ 2022 թվականի հունվարի 13-ն ընկած ժամանակահատվածում զբաղեցնելով ՀՀ Արարատի մարզի համայնքներից մեկի ղեկավարի պաշտոնն ու հանդիսանալով պաշտոնատար անձ, խախտելով ՀՀ հողային օրենսգրքի 60-րդ հոդվածի 10-րդ մասով սահմանված՝ քաղաքացիներին եւ իրավաբանական անձանց սեփականության իրավունքով համայնքային սեփականություն հանդիսացող ընդհանուր օգտագործման արոտավայրեր փոխանցելու արգելքը, ընդհանուր օգտագործման 23 արոտավայրերը աճուրդային եղանակով օտարել է 21 ֆիզիկական անձանց՝ ընդամենը շուրջ 4.892.000 դրամ արժեքով, իսկ ՀՀ կադաստրի կոմիտեի իրավասու պաշտոնատար անձինք կատարել են նշված գործարքների պետական գրանցումը, որի արդյունքում պետությանը պատճառվել է առանձնապես խոշոր չափերի գույքային վնաս:
Առերեւույթ հանցանքի մասին կազմված պատշաճ հաղորդումն ու կից փաստաթղթերն ուղարկվել են ՀՀ հակակոռուպցիոն կոմիտե՝ քրեական վարույթ նախաձեռնելու հարցը որոշելու համար։
