ԿԳՄՍ նախարարության աջակցությամբ իրականացվող Երևանի և ՀՀ մարզերի երաժշտական և արվեստի դպրոցների փոխգործակցության «Քույր դպրոցներ» ծրագրի շրջանակում ընդգրկված տաղանդավոր երեխաները սեպտեմբերի 19-24-ը համերգներով հանդես են եկել Ֆրանսիայի Լիոն և Վալանս քաղաքներում:
2025 թվականին «Քույր դպրոցներ» ծրագիրն ընդլայնել է իր գործունեության շրջանակը և առաջին անգամ հանդես եկել արտերկրում: Ֆրանսիայում գործող «Ֆրանս-Աշտարակ» մշակութային հաստատության նախագահ Լևոն Չատիկյանի հրավերով ծրագրի 10 շահառուներ, որոնք ներկայացնում են Երևանի, Գյումրիի, Աշտարակի և Կապանի երաժշտական և արվեստի դպրոցները՝ Երևանի Ալ. Հեքիմյանի անվան երաժշտական դպրոցի տնօրեն Մոնիկա Պետրոսյանի և Սայաթ-Նովայի անվան երաժշտական դպրոցի տնօրեն Գարիկ Նազարյանի գլխավորությամբ, համերգային ծրագրերով ելույթ են ունեցել Լիոն և Վալանս քաղաքներում:
«Քույր դպրոցներ» ծրագրի շահառուների համար Վալանսի երաժշտության և պարի կոնսերվատորիայում կազմակերպվել են վարպետության դասընթացներ: Կոնսերվատորիայի տնօրեն Դիդյե Վադղոն, կարևորելով ֆրանս-հայկական մշակութային կապերի ամրապնդման գործում նմանատիպ ծրագրերի իրականացումը, բարձր է գնահատել հայ պատանի երաժիշտների կատարողական մակարդակը: Նա շնորհակալություն է հայտնել ծրագրի նախաձեռնողներին՝ վստահեցնելով, որ Վալանսի կոնսերվատորիան ակտիվորեն կներգրավվի նոր ձևավորված համագործակցության ամրապնդման և փոխայցելությունների կազմակերպման ծրագրերում:
Ուղևորության շրջանակում իրականացվել են նաև ճանաչողական այցելություններ, ծրագրի մասնակիցներին ընդունել է Լիոնում ՀՀ գլխավոր հյուպատոս Նարինե Նիկոլյանը:
Կարդացեք նաև
Նշենք, որ Երևանի Ալ. Հեքիմյանի անվան երաժշտական դպրոցի նախաձեռնությամբ իրականացվող «Քույր դպրոցներ» ծրագիրն իր գործունեությունը սկսել է 2019 թվականին՝ տարիների ընթացքում իր շուրջը համախմբելով հանրապետության երաժշտական և արվեստի դպրոցներին, մանկավարժներին, աշակերտներին:
Յուրաքանչյուր տարի հանրապետության երաժշտական և արվեստի դպրոցների սաներն ու մանկավարժները ծրագրի շրջանակում իրականացնում են փոխայցելություններ, որոնց ընթացքում հանդես են գալիս համերգային ծրագրերով, կազմակերպվում են փորձի փոխանակման, վարպետության դասընթացների, հայրենաճանաչության տարատեսակ միջոցառումներ:
ՀՀ ԿԳՄՍՆ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ԵՎ ՏԵՂԵԿԱՏՎՈՒԹՅԱՆ ՎԱՐՉՈՒԹՅՈՒՆ
